Parashikimi i motit

nga Lutfi Dervishi

Mbi vendin tonë do të mbizotërojë një mot i nxehtë, me vranësira të dendura, jo vetëm për shkak të rrezeve të forta të diellit, por edhe nga zjarret që ndizen vetvetiu në zonat që pritet të zhvillohen si dhe nga djegiet masive të mbeturinave në qiell të hapur.

Ultësira perëndimore, ashtu si çdo verë, do digjet vende-vende, sidomos në zonat turistike si pasojë e mungesës së reshjeve dhe ujit pijshëm.

Në zonat verilindore dhe jugperëndimore, pritet një valë e re dorëheqjesh, çka pritet të sjellë freski politike. Këto dorëheqje janë të përkohshme në zonën e Finiqit dhe Konispolit.

Pasditja do të sjellë shpërthime sporadike tritoli, që do ndjekin aksin e paketës së maleve. Re të dendura tymi do ngrihen në Fier, Elbasan, Tiranë, ku janë vendosur incineratorët që do të vijojnë djegien e fondeve publike.

Era do fryjë lehtë, por mjaftueshëm e fortë për të ngritur faturat në detin Jon për peshkatarët. Kujdes i veçantë duhet treguar në zonat e thella malore, për faturat e staneve dhe haneve.

Rekomandohet të mbani me vete: një çadër për diellin, një maskë për tymin, dhe një magnez për memorien që të kujtoni dhe kuptoni dallimin mes asaj që dëgjoni dhe asaj që shikoni.