Kryetari i Bashkisë Zagreb, Tomislav Tomasheviç, dhe ai i Bashkisë Kiev, Vitalij Kliçko, kanë firmosur sot në Paris, Marrëveshjen për miqësi dhe bashkëpunim, duke u zotuar për një bashkëpunim më të fortë të kryeqytetit kroat dhe atij ukrainas për çështjet e zhvillimit të qëndrueshëm, në veçanti në ekonomi, transportin publik, mbrojtjes ambientit, arsimit, sportit, turizmit, shëndetësisë dhe kulturës.
“Qyteti i Zagrebit qëndron fort me qytetin e Kievit dhe qytetarët e Ukrainës në luftën e tyre për liri dhe demokraci. Më vjen mirë se me firmosjen e kësaj marrëveshje do të kemi mundësi të zhvillojmë projekte konkrete të përbashkëta prej të cilave do të përfitojnë qytetarët e të dyja qyteteve tona,” tha kryebashkiaku i Zagrebit Tomasheviç pas firmosjes së marrëveshjes.
Vendimin për firmosjen e kësaj Marrëveshje e ka marrë Këshilli Bashkiak i Zagrebit në mbledhjen e cila u zhvillua në Nëntorin e vitit 2023.
Ndryshe, Marrëveshja është firmosur në kuadër të Takimit të kryebashkiakëve evropianë, organizator i së cilës është kryetari i Bashkisë Paris, Anne Hidalgo.
Në këtë takim marrin pjesë kryebashkiakët e Parisit, Kievit, Kopenhagenit, Sarajevës, Stambollit, Tiranës, Reykjavikut, Athinës dhe Zagrebit. Takimi po mbahet në kuadër të festimit të Ditës së Evropës dhe i kushtohet rolit të qyteteve në përballjen e sfidave kryesore në demokracitë europiane.