Parku Kombëtar i Butrintit, denoncon Agron Shehaj: Qeveria hoqi një pjesë, ia dha Gjiknurit…
Ndonëse opozita u mundua të bllokoj punimet e seancës plenare, 33 minutat e kaosit parlamentar i mjaftuan Edi Ramës për të miratuar 7 Pikat e Rendit të Ditës me theks të veçantë atë të pestën të cilën e prisnin me padurim gjithë 34 investitorët strategjik rilindas, të cilëve Kryeministri u ka premtuar se janë në proces vlerësimi.
Pasi pa problem u tejkalua edhe penegesa e fundit e investitorëve strategjik për tu miratuar ndryshimet parlament për ta shtyr afatin e Ligjit deri në fund të vitit, deputeti i Partisë Demokratike, Agron Shehaj, ka publikuar para Kuvendit dy fotografi si dëshmi e pasojës direkte të Ligjit të Investimeve Strategjike i cili u miratua pavarësisht prezenc së deputetëve në parlament.
“Kjo ‘pika e vogël’ , – tregoi Shehaj, duke përdorur me ironi shprehjen e ministres Mirela Kumbaro – ishte pjesë e Parkut Kombëtar të Butrintit. Qeveria e hoqi nga Parku dhe ia dha Gjiknurit. Kjo është. Ishte një perlë e paprekur, pjesë e Parkut, tani shikojeni çfarë po ndërton Gjiknuri,” tha Agron Shehaj duke vazhduar denoncimin dhe me rastin e ministres Olta Xhaçka:
“E njëjta gjë, ish-ministrja. Ky është plazhi i Dhërmiut, ku ish-ministrja u fut në politikë me xhepat bosh dhe tani po ndërton një resort. Kjo është arsyeja pse Ligji për Investimet Strategjike është shtyrë edhe një vit tjetër.
Kjo është arsyeja pse para dy javësh u aprovuan ndryshimet e Ligjit për Zonat e Mbrojtura, sepse këta kanë vetëm një qëllim: të kapin çdo gjë që ka vlerë në bregdetin e Shqipërisë dhe të ndërtojnë resorte për veten e tyre, për miqtë e tyre, për familjarët e tyre,” tha deputeti i Partisë Demokratike, Agron Shehaj duke përfunduar:
“Unë mendoj se problemi i këtij vendi është mazhoranca, është qeveria që merr pronat e qytetarëve të thjeshtë dhe i përvetëson dhe pasurohet me to. Ky është problemi, pastaj mund të diskutojmë sa të duam mbi mënyrën si bëhet opozita.
Unë jam i mendimit që ne duhet të bëjmë një opozitë të vërtetë dhe të flasim troç. Me fakte dhe me prova dhe jo në përgjithësi. Kjo është ajo çfarë unë bëj dhe mbaj përgjegjegjësi.”
Ndryshe, Ligji për investimet strategjike i cili parashikon masa mbështetëse, nxitëse apo lehtësuese për projekte që parashikojnë vlera të konsiderueshme investimi apo sjellje të markave ndërkombëtare, u miratuar në vitin 2015, është shtyrë disa herë, ndërsa përfundoi efektet më 31 dhjetor 2023 për tu shtyr sot deri në fund të vitit 2024. Në total nga viti 2016 e deri më sot të paktën 88 projekte investimi kanë kërkuar që të përfitojnë statusin e investimit apo investitorit strategjik. Nga këta 40 prej tyre e kanë përfituar atë ndërkohë që 14 projekte janë refuzuar dhe 34 janë në fazë vlerësimi.
