Parlamenti britanik/ Basha në Komisionin e Sigurisë, ja si do ta kthejmë besimin…

Kryetari i Partisë Demokratike, Lulzim Basha, në takim me Kryetarin i Komisionit të Sigurisë dhe Inteligjencës pranë Parlamentit britanik, Dominic Grieve theksoi domosdoshmërinë për të forcuar shtetin ligjor dhe demokracinë në Shqipëri si dhe vendosmërinë e tij që bashkëpunimi midis dy vendeve, në fushën e sigurisë dhe të zbatimit të ligjit të jetë sa më i fuqishëm dhe sa më efikas.

“Ndaj veprimi i vendosur dhe bashkëpunimi i ngushtë në luftë kundër krimit të organizuar dhe në veçanti trafikut të qenieve njerëzore e të narkotikëve, do të ndihmojë në goditjen e kriminalitetit dhe në rikthimin e besimit. Kjo do të shërbejë për të mos njollosur reputacionin e komunitetit shqiptar në Britani nga një pakicë e përfshirë në aktivitete kriminale,” tha Lulzim Basha duke nënvizuar vendosmërinë edhe për të ndërtuar në Shqipëri, institucione të forta ligjzbatuese të pandikuara dhe të afta për të luftuar krimin e organizuar dhe narkotrafikun.

Lulzim Basha me këtë rast diskutoi me Dominic Grieve edhe për rrezikun e të gjitha retorikave për ndryshimin e kufijve në Ballkan.

“Shtetet e Ballkanit janë multietnike dhe se kjo është një vlerë europiane, të cilën ne duhet ta mbrojmë. Çdo ide tjetër rrezikon paqen dhe stabilitetin rajonal, hap precedentë të rrezikshmërinë në Ballkan dhe përtej Ballkanit, si dhe dobëson krahun jugor të NATO-s duke i shërbyer axhendave që janë në konflikt me sigurinë dhe vlerat euroatlantike,” tha Kryetari i Partisë Demokratike, Lulzim Basha duke garantuar Kryetarin e Komisionit të Sigurisë dhe Inteligjencës pranë Parlamentit britanik, Dominic Grieve, se Shqipëria do të qëndroi krah për krah aleatëve tanë euroatlantikë për të parandaluar çdo plan apo ide që minon interesat strategjike të NATO-s në Europën Juglindore.