Parlamenti Evropian refuzon dy kandidatë për Komisionerë

Komiteti për Çështje Ligjore i Parlamentit Evropian mori vendimin përfundimtar që dy kandidatë për Komisionerë të Bashkimit Evropian nuk janë të përshtatshëm për ato poste.

Bëhet fjalë për kandidatin hungarez, Laszlo Trocsanyi, dhe kandidaten rumune, Rovana Plumb, tek të cilët Komiteti për Çështje Ligjore ka konstatuar konflikte interesi, raporton RFE.

Kjo është procedurë e paparë, pasi deri më tash nuk ka pasur raste kur kanidatët për komisionerë janë refuzuar në fazën fillestare.

Komiteti është mbledhur të premten kur edhe janë konstatuar konfliktet e interesit, por për shkak të mungesës së praktikës në lidhje me këtë çështje, kryetari i Parlamentit Evropian, David Sassoli, ka kërkuar që Komiteti ta shqyrtojë sërish sot situatën.

Me rastin e marrjes në pyetje në Komitetin për Çështje Ligjore të PE-së, kandidatja Rovana Plumb nuk i ka lajmëruar dy kredi private në vlerë prej gati një milion euro, ndërsa kandidati Laszlo Trocsanyi nuk ka arritur të sqarojë lidhjet midis firmës së tij juridike dhe punës që ka bërë për Qeverinë hungareze.

Ndërkohë, disa anëtarë të Komitetit kanë identifikuar edhe lidhjet e Troscanyit me Qeverinë ruse.

Rovana Plumb ka qenë kandidate për Komisionere të Transportit të BE-së, ndërsa Laszlo Trocsanyi, Komisioner për Zgjerimin.

Meqë gjetjet e Komitetit për Çështje Ligjore të Parlamentit Evropian janë përfundimtare, kryetari i Parlamentit, Sassoli, duhet t’i dërgojë tani letër Presidentes së Komisionit Evropian, Ursula von der Leyen, përmes së cilës do të pyetet për hapat e saj të ardhshëm.

Edhe pse Komiteti rekomandon që këta dy emra të zëvendësohen me propozime të reja nga Bukureshti dhe Budapesti, Von der Leyen ka lirinë të vendosë se çfarë të bëjë me kandidatët e saj.

Seancat dëgjimore të konfirmimit të tyre, të parapara për në fillim të tetorit, janë shtyrë deri në vendimin e ri të Von der Leyen