Parlamenti i Kosovës, marrëveshjet ndërkombëtare në mëshirë të opozitës
Sot me fillim në ora 10:00, Parlamenti i Kosovës do të mbajë seancën e parë plenare me vetëm një pikë të Rendit të Ditës, Shqyrtimin e Propozim-amendamentit Kushtetues nr.27.
Ndërsa seanca e dytë plenare e cila fillon në ora 10:30 me 12 pika të Rendit të Ditës në rend dite, pritet të miratohen disa marrëveshje ndërkombëtare të cilat opozita, me përjashtim të LDK-së, i ka shndërruar në kartë politike pavarësisht dëmit që po i shkakton Kosovës, refuzon ti votoj
Kështu, sot pritet ratifikimi i Marrëveshjes së financimit në mes të Republikës së Kosovës, përfaqësuar nga Ministria e Financave, Punës dhe Transfereve dhe Bankës Evropiane për Investime për projektin “Rehabilitimi i linjës hekurudhore 10 B”, si dhe atë për shqyrtimin e Projektligjit për ratifikimin e Marrëveshjes në mes Republikës së Kosovës, e përfaqësuar nga Ministria e Bujqësisë, Pylltarisë dhe Zhvillimit Rural dhe Deutsche Gesellschaft für Zusammenarbeit (GIZ) GmbH, për projektin mbështetja për zhvillimin e qëndrueshëm të sektorit të bujqësisë në zonat rurale përmes diversifikimit të aktiviteteve.
Parlamenti i Kosovës, dje sërish ka dështuar t’i miratojë marrëveshjet ndërkombëtare që ishin në rend të ditës në seancën plenare. Dy partitë opozitare, PDK dhe AAK nuk morën pjesë fare në votim, ndërkaq votat e partisë në pushtet, Lëvizjes Vetëvendosje dhe LDK-së ishin të pamjaftueshme për t’i miratuar.
Ndryshe, Kryetari i Parlamentit të Kosovës, Glauk Konjufca ka kritikuar, dje, deputetët për mos votimin e marrëveshjeve ndërkombëtare, të cilat për një kohë të gjatë nuk po marrin votat e deputetëve.
