Parlamenti i Kosovës miraton rezolutë për unifikim doganor me Shqipërinë

Parlamenti i Kosovës, 5 Majin, mund ta shpallë Ditën e Rezolutave. Pas dështimeve të shumëta, deputetët e këtij Parlamenti, miratuan rezolutën për unifikimin doganor ndërmjet Kosovës dhe Shqipërisë, atë për heqjen e tarifave të roming-ut në telekomunikim ndërmjet këtyre dy vendeve dhe një rezolutë për gjendjen jo të mirë të rinisë kosovare .

Rezolutën për unifikimin doganor ndërmjet Kosovës dhe Shqipërisë e ka propozuar Grupi parlamentar i Partisë Socialdemokrate, e cila është mbështetur nga 67 deputetë, 1 ka qenë kundër dhe një ka abstenuar.

Përfaqësuesit e këtij subjekti politik kanë ftuar Qeverinë që të angazhohet sa më shpejt për realizimin e kësaj rezolute që do të lehtësojë qarkullimin e mallrave në mes Kosovës dhe Shqipërisë, duke i dhënë shtytje zhvillimit ekonomik të të dyja vendeve.

Kuvendi i Kosovës, ka miratuar dhe një tjetër rezolutë për heqjen e tarifave të roming-ut në telekomunikim ndërmjet këtyre dy vendeve.

Deputetët sot miratuan edhe rezolutë në lidhje me gjendjen jo të mirë të rinisë kosovare dhe votuan pro rekomandimeve nga debati parlamentar në lidhje me Kartonin Jeshil.