Parlamenti i Kosovës nuk arrinë as sot të përmbyll seancën konstituive

Përpjekja e gjashtë e Lëvizjes Vetëvendosje për konstituimin e Parlamentit të Kosovës sërish ka dështuar.

Sërish ishin vetëm 57 vota për Albulena Haxhiun që nuk mjaftuar ta zgjedhin për Kryetare të Parlamentit, 47 deputetë votuan kundër, ndërkaq 3 abstenuan.

Sapo nisi seanca e cila zgjati vetëm disa minuta, kryesuesi Avni Dehari u bëri thirrje partive që të kenë mirëkuptim e të zhbllokohet situata.

“Mua nuk më takon të imponoj votimin, por do të ishte mirë të kishte mirëkuptim të zhbllokojmë këtë situatë sepse me të vërtetë qytetarët po presin të krijohen institucionet e Republikës së Kosovës”.

Kur doli në foltore, ish-kryetari Glauk Konjufca, tha se propozimi i tyre mbetet i njëjtë, derisa kërkoi mirëkuptimin e të gjithëve për të kontribuuar drejt zgjidhjes së bllokadës.

“Ne sërish e bëjmë propozimin e njëjtë. Pra, emri ynë i vetëm është Albulena Haxhiu për kryetare të Kuvendit të Kosovës. Kërkoj mirëkuptimin tuaj t’i kontribuoni zhbllokimit të kësaj situatë në të cilën kemi mbetur, në mënyrë që të kalojmë në faza tjera edhe të zgjedhjes së nënkryetarëve,” tha Konjufca.

Por, votimi solli të njëjtin rezultat edhe të katërtën herë për Albulena Haxhiun, e cila nuk arriti t’i merrte 61 votat e nevojshme për t’u zgjedhur në krye të legjislativit.

Pas këtij votimi, deputeti dhe Kryetari i partisa Nisma, Fatmir Limaj, i ka bërë thirrje partisë fituese të zgjedhjeve, Lëvizjes Vetëvendosje, t’u hapë rrugën partive të tjera parlamentare për formimin e institucioneve të reja, ndërsa e propozuara e LVV-së për postin e Kryetarit të Parlamentit, Albulena Haxhiu, tha se nëse Parlamenti nuk arrin të konstituohet, siç po ndodh që gjashtë herë, atëherë është e qartë që vendi duhet të shkojë në zgjedhje!

Ndryshe, deputetët e Parlamentit të Kosovës do të mblidhen sërish pas 48 orësh, më 27 prill në ora 10:00.