Parlamenti i Kosovës po shkatërron Parlamentin e Kosovës

Ashtu sikur se seanca e mazhorancës që dështoi në mungesë të numërave për të filluar seancën me qëllim të miratimit të Ekipit Negociator, edhe seanca e opozitës për të debatuar lidhur me angazhimet e Presidentit të Kosovës për përfshirjen e “shkëmbimit të territoreve” apo “korrigjim të kufijve” në dialogun në mes të Kosovës dhe Serbisë, nuk ka arritur të nis për shkak të mungesës së numrit të domosdoshëm të deputetëve prezent.

Dallimii vetëm ishte se koalicioni qeverisës u tradhtua nga serbët e Listës Srpska ndërsa opozita nga AAK dhe NISMA që fillimisht  e mbështetën nismën e LDK-së, së cilës i dhanë firmat edhe deputetët e Vetëvendosjes dhe PSD-së.

Pas dështimit, Kryetari i Parlamentit të Kosovës, Kadri Veseli kërkoi kordinim mes grupeve parlamentare për shkak se siç tha ka një mos koordinim në mes vete.

“Nuk kam mund ta hap seancën, nuk janë 61 deputetë, kjo është arsyeja. Çështja është që nuk po mundemi fare të futemi në seancë dhe çështja e dytë është se grupet parlamentare duhet të koordinohen në mes vete, ju e dini saktë sa deputet keni, ka edhe një qëndrim politik nga partnerët e koalicionit që iu ka dhënë një mundësi, iu kisha lut të na jepeni një qartësi“, tha Veseli.

Ai sqaroi edhe arsyen e seancës për ekipin negociator, ku tha se janë futur me 63 deputet në seancë, por nuk kanë pasur kuorum për ta votuar.

Në fund, nënkryetari i Parlamentit, Kujtim Shala, kërkoi që seanca të vazhdojë nesër në ora 10:00, gjë që edhe është vendosur.

Megjithatë, Veseli insistoi në propozimin e tij, duke thënë se do të ishte mirë që të mbahet një mbledhje e kryesisë dhe nëpërmjet një koordinimi të mbahet një seancë e përbashkët në mes pozitës dhe opozitës.

Sidoqoftë, kur kanë ngelur vetëm edhe 24 orë deri tek takimi i Brukselit, në mes të Kosovës dhe Serbisë, shteti i Kosovës është në një situatë shumë absurde, ku Presidenti po degradon institucionin e Presidentit ndërsa deputetët, Parlamentin e Kosovës.