Parlamenti i Kosovës, votohet Qeveria Kurti 3

Pas konstituimit të Parlamentit të Kosovës, me 66 vota për, 49 kundër dhe asnjë abstenim, deputetët e legjislaturës së dhjetë votuan propozimin e partisë fituese Lëvizja Vetëvetndosje e cila arriti të krijoi shumicën parlamentare, Qeverinë Kurti 3.

“Urime, pas zgjedhjes së Qeverisë, anëtarët e Qeverisë e japin betimin para deputetëve të Kuvendit të Kosovës,”, tha Kryetarja e re e Parlamentit, Albulena Haxhiu.

Kryeministri i sapozgjedhur për katër vitet e ardhshme, Albin Kurti u betua para deputetëve të legjislaturës së dhjetë të Parlamentit të Kosovës bashkë me kabinetin e tij qeveritar, të përbërë nga 19 ministra, 4 ministri më shumë se në qeverisjen e kaluar.

Kryeministër Albin Kurti

Zv/Kryeministër i parë dhe ministër i Punëve të Jashtme dhe Diasporës, Glauk Konjufca

Zv/Kryeministre e dytë dhe ministre e Drejtësisë, Donika Gërvalla

Zv/Kryeministër i tretë për çështje të pakicave dhe bashkëpunim, Fikrim Damka

Ministër i Financave, Hekuran Murati

Ministër për Punë, Familje dhe Vlerat e Luftës Çlirimtare, Andin Hoti

Ministër i Mbrojtjes, Ejup Maqedonci

Ministër i Punëve të Brendshme, Xhelal Sveçla

Ministër i Digjitalizimit dhe Administratës Publike, Lulëzon Jagxhiu

Ministër i Shëndetësisë, Arben Vitia

Ministër i Arsimit dhe Shkencës, Hajrulla Çeku

Ministre e Kulturës dhe Turizmit, Saranda Bogujevci

Ministër i Sportit dhe Rinisë, Blerim Gashani

Ministër i Administrimit të Pushtetit Lokal, Elbert Krasniqi

Ministre e Mjedisit dhe Planifikimit Hapësinor, Fitore Pacolli

Ministër i Bujqësisë, Pylltarisë dhe Zhvillimit Rural, Armend Muja

Ministër i Infrastrukturës dhe Transportit, Dimal Basha

Ministre e Industrisë, Ndërmarrësisë, Tregtisë dhe Inovacionit, Mimoza Kusari

Ministre e Ekonomisë, Artane Rizvanolli

Ministër për Komunitete dhe Kthim, Nenad Rashiq

Ministër për Zhvillim Rajonal, Rasim Demiri

Kjo pra është Qeveria me të cilë Kryeministri Albin Kurti prezantoi një Program shumë optimist duke premtuar ndërtimin e një Kosovë më të drejtë e gjithëpërfshirëse.

Prezantimin e Programit e nisi me procesin gjyqësor në Hagë ndaj ish-krerëve të UÇK-së.

“Kërkesa e Prokurorisë, ZPS, për dënimin prej 45 vitesh për secilin, ku përfshihen edhe pretendimet për krimet kundër njerëzimit është orvatje që bie ndesh me të vërtetën dhe mohon kontekstin historik e politik të luftës sonë çlirimtare,” tha ai duke shtuar se barazimi mes drejtuesve të UÇK-së dhe të një regjimi gjenocidal është shtrembërim faktik e historik, i padurueshëm për familjet e viktimave.

Albin Kurti, tha se pesë vitet e fundit, duke përfshirë edhe një vit si qeveri në detyrë, kanë zhvilluar e ndërtuar një Kosovë më të drejtë, më të fortë dhe më gjithëpërfshirëse. Sfidat e inflacionit janë përballuar me politika mbështetëse për qytetarët, teksa përmendi rritjen e punësimeve dhe të pagës minimale.

“Pesë vitet e fundit, pothuajse një vit në qeveri në detyrë pra pa kompetenca të plota, kemi zhvilluar e ndërtuar një Kosovë më të drejtë, më të fortë dhe më gjithëpërfshirëse. Kemi pasur rritjen ekonomike më të mëdha në rajon pavarësisht pandemisë, kriza energjetike dhe inflacioni, me një rritje mesatare prej 6% të bruto produktit vendor, duke mos rënë asnjë vend ndër 4%,” tha Kurti duke premtuar se në mandatin e ardhshëm do të ketë dyfishim të shtesave për fëmijë. Ai foli edhe për sfidat e vazhdueshme nga Serbia përmes sulmeve të ndryshme, teksa tha se këtë e përkthyen në investim në siguri të vendit.

“Ne do të investojmë 400 milionë euro për të ndërtuar pesë diga të reja, të cilat do të mbledhin dhe menaxhojnë burimet ujore. Përmes këtyre investimeve do të sigurojmë furnizim të qëndrueshëm për të gjithë qytetarët dhe amvisëritë, do të rrisim rezistencën tonë ndaj ndryshimeve klimatike”, tha Kurti.

“Ligji për Byronë Shtetërore për Konfiskimin e pasurisë së pajustifikueshme duhet të ecë përpara së bashku me vetingun, ashtu që drejtësia të bëhet edhe e drejtë, edhe e shpejtë, edhe e besueshme. Do të themelohet prokuroria e re e specializuar për çështje të krimit të organizuar dhe korrupsionit dhe zyra për hetime disiplinore,” premtoi Kurti ndërsa foli dhe për thellimin e reformës në transformimin digjital, duke mundësuar që sipas tij, çdo qytetar të komunikojë me shtetin pa barriera, në mënyrë të shpejtë, efikase dhe transparente, që nga aplikimi për dokumente, deri te shërbimet sociale dhe biznesore.

“Digjitalizimi është mjet për t’i shërbyer çdo qytetari dhe do të përdoret për progres shoqëror, zhvillim ekonomik të qëndrueshëm, llogaridhënie të gjerë dhe cilësi të lartë. Në mandatin që po lëmë pas eksportet dhe investimet e huaja direkte u dyfishuan, por tani është koha të shumëfishohet prodhimi. Përgjatë katër viteve në vazhdim do të investojmë rreth 1 miliard euro në prodhim përmes garantimit të kredive për investitorët”, tha ai.

Në fund, premtoj dhe normalizimin e marrëdhënieve me Serbinë me dialogun konstruktiv 

“Normalizimin e marrëdhënieve me Serbinë do ta ndjekim përmes dialogut konstruktiv, marrëveshjes bazike të Brukselit dhe aneksit të zbatimit të Ohrit. Normalizimi është çështje e rregullimit të marrëdhënieve mes dy shteteve si raport i jashtëm, e jo ndërhyrje në çështje të brendshme.”

Pas prezantimit të programit dhe kabinetti qeveritar vlenë të theksohet fjalimi prej shtetari i Kryetarit të PDK, Bedri Hamza.

Kryetari i Partisë Demokratike të Kosovës, deputeti Bedri Hamza, në fjalimin e tij në seancën e jashtëzakonshme për zgjedhjen e Qeverisë së re, tha se është përgjegjësi e madhe që sot fillojnë punën në këtë legjislaturë, në një moment, siç tha ai, kur qytetarët presin stabilitet, zhvillim ekonomik e institucione që punojnë me integritet dhe profesionalizëm.

“Duke respektuar trashëgiminë e demokracisë dhe lirisë e cila këto ditë po mbrohet edhe në gjykimin e themeluesve të Ushtrisë Çlirimtare të Kosovës e që njëherësh janë edhe bashkëthemelues së bashku me shumë gra e burra të nderuar të kombit, të vetë Republikës së Kosovës”.

Hamza tha se seanca themeltare e legjislaturës së dhjetë, është dëshmi e rrugës së vështirë që ka kaluar Kosova për të ndërtuar shtetin dhe demokracinë e saj.

“Sot detyra jonë është që këtë shtet ta forcojmë më tej përmes mbrojtjes së të vërtetës dhe drejtësisë në Hagë, si një temë që sot dominon vëmendjen dhe  ndërgjegjen e kujtdo që respekton luftën për liri e pavarësi,” tha Hamza duke theksuar se kontributi i tyre në muajt e vitet e ardhshme duhet të bëhet edhe përmes politikave të përgjegjshme ekonomike, përmes mbështetjes së sektorit privat, përmes rritjes së mirëqenies sociale.

“Një diplomaci më të urtë e të fokusuar në kthimin e mirëbesimit me aleatët dhe përmes garantimit të sundimit të ligjit për çdo qytetar. Deputetët e PDK-së do të jenë në ballë të ruajtjes së këtyre vlerave”, tha Hamza.

Thirrje liderëve, të marrin pjesë në marshin gjithë popullor me 17 shkurt

Kryetari i Partisë Demokratike të Kosovës, Bedri Hamza i ka bërë thirrje liderëve politikë e institucional që të bashkohen në marshin gjithë popullor, i cili pritet të mbahet më 17 shkurt, në përvjetorin e Pavarësisë së Kosovës, ky, sipas tij, do të ishte veprim minimal e modest.

“PDK dhe shpresoj të gjithë deputetët e pozitës dhe opozitës do të bashkohemi të ndihmojmë pa mëdyshje, pa politizime, betejën për drejtësinë dhe të vërtetën që po zhvillohet në Hagë. Me këtë rast ftoj të gjithë kolegët, të gjithë liderët institucional e partiakë të jemi së bashku më 17 shkurt në marshin gjithë popullor, ‘drejtësi jo politikë’, si veprim minimal dhe modest të ngritjes së zërit tonë. Kuvendi dhe Qeveria e ardhshme ka për obligim të bëjë maksimumin që kjo mbrojtje e drejtësisë të përkthehet në verime konkrete,” tha Hamza duke paralajmëruar se në seancën e parë do ta procedojnë votimin e Rezolutës, me të cilën kërkohet gjykim i drejt, i paanshëm dhe profesional.

“Edhe vetë ju këto ditë keni qenë dëshmitarë të kërkesave absurde të prokurorisë në Hagë, unë nga kjo seancë ju njoftoj se në seancën e parë të punës do ta procedojmë votimin e rezolutës, rezolutë që tash i është dorëzuar Kuvendit me të cilën kërkohet gjykim i drejt, i paanshëm dhe profesional në përputhje me standardet më të mira ndërkombëtare dhe në respektim të plotë të të drejtave të njeriut,” tha Hamza duke shtuar se shtet financuese dhe mbështetëse të Dhomave të Specializuara të Kosovës në Hagë duhet të respektojnë marrëveshjen me Kosovën, që Gjykata të operojë në bazë të ligjeve dhe Kushtetutës së Republikës.

Këto shtete financuese dhe mbështetëse të Dhomave të Specializuara të Kosovës, tha ai, do të marrin përgjegjësi nëse shkelen këto të drejta. Hamza shtoi se në këtë rezolutë pret përkrahjen e të gjithëve.

Kështu, pas një viti të humbur, duke konfirmuar se sa minuta ishin të nevojshëm që Kosova për të formuar institucionet e reja, dhe se përveç kohës së humbur nuk kishte nevojë të humbë edhe gjithë ato para për rrogat kot të deputetëve të legjislaturës së nëntë dhe mbajtjen e zgjedhjeve të jashtëzakonshme, pasi ishin po këto parti që për paaftësinë e tyre, nuk arritën të konstituojnë parlamentin.

Ndryshe, Kryetare e re e Parlamentit do të jetë Albulena Haxhiu ndërsa Nënkryetarë, Ardian Gola nga LVV, Vlora Çitaku nga PDK, Kujtim Shala nga LDK, Slavko Simiç nga Lista Serbe dhe Emilja Rexhepi nga grupi multietnik.