Parlamenti i Maqedonisë së Veriut miraton dorëheqjen e Zaevit

Parlamenti i Maqedonisë së Veriut ka miratuar sot dorëheqjen e kryeministrit Zoran Zaev, gjë që është pritur me duartrokitje nga VMRO DPMNE opozitare.

Dorëheqja e kreut të Qeverisë është konstatuar pa debat në seancën e Parlamentit, pasi këtë e ka kërkuar Zaevi në arsyetimin me shkrim të dorëheqjes.

Zaev, dorëheqjen nga Qeveria, e ka paralajmëruar më 31 tetor, pas disfatës së thellë të Lidhjes Socialdemokrate, LSDM, në zgjedhjet lokale.

Ai ka marrë përgjegjësinë për humbjen nga VMRO DPMNE duke dhënë dorëheqjen edhe nga drejtimi i partisë.

“Dëshiroj të jap shembull për të njohur vendimet e virtytshme kur është e nevojshme dhe për të dhënë një kontribut tjetër në forcimin e kapaciteteve demokratike të popullit, por edhe liderëve të ardhshëm që të jenë të vetëdijshëm për detyrën e tyre qytetare kur kujdesen për vendin e tyre,” thekson Zaev në arsyetimin e aktit të dorëheqjes.

Pas konstatimit të dorëheqjes, kryetari i Parlamentit, Talat Xhaferi, ka njoftuar presidentin, Stevo Pendarovski, i cili në afat prej dhjetë ditëve duhet të mandatojë kandidatin e ri për kryeministër të Maqedonisë së Veriut.

Ai do të jetë, Dimitar Kovaçevski, kryetar i Lidhjes Socialdemokrate, pasi paraprakisht ka njoftuar se ka shumicën parlamentare në Parlament.

Pjesë e Qeverisë së re, përveç LSDM-së dhe Bashkimit Demokratik për Integrim, do të jetë edhe partia Alternativa, e cila zëvendëson Lëvizjen Besa, që pas zgjedhjeve lokale u largua nga Qeveria.

Shumica e re parlamentare ka 64 deputetë nga 120 sa numëron Parlamendi i Maqedonisë së Veriut.

Kandidati i mandatuar, sipas Kushtetutës, brenda 20 ditëve duhet të dorëzojë për miratim në Parlamend përbërjen e re qeveritare, e cila votohet me të paktën 61 vota të deputetëve.

Qeveria e re, raporton RFE, bazuar në afatet kushtetuese, duhet të zgjidhet më së voni deri nga mesi i muajit janar të vitit 2022.