Parlamenti i përjashtimeve, deputetët e PS dhe ata të PD bllokojnë njëri-tjetrin
Masat e Komisionit të Etikës së Edi Ramës sot u reflektuan me etikën që ka Kryeministri në punimet e Konferencës së Kryetarëve ndërkohë Kryetari i Grupit Parlamentar të PS, Bledi Çuçi, tund çelësat e burgut për deputetët demokratë!
Sot Kryetari i Grupit Parlamentar të PD, Gazment Bardhi, nuk u lejua të marrë pjesë në Konferencës e Kryetarëve dhe u ndalua nga garda me urdhër të Partisë Socialiste, por kjo parti nuk llogariti që as homologu socialist i Bardhit, Bledi Çuçi, nuk do të lejohet të marrë pjesë në këtë Konferencë, jo nga garda por nga deputetët demokratë!
Pjesëmarrja në këtë mbledhje iu mohua edhe ministrit socialist të Ekonomisë, Ervin Mete, por nuk kishte ndonjë pengesë të kthehet mbrapsht pa e prezantuar buxhetin për vitin 2024.
Përpjekjet e Kryetarit të Grupit Parlamentar të PD-së, Gazment Bardhi, për të hyrë sot në mbledhjen e Konferencës së Kryetarëve ashtu si dhe arsyetimi i kërkuar nga Kryetarja e Parlamentit, Lindita Nikolla, pse nuk i lejohet hyrja në këtë Konferencë, ngelën pa përgjigje:
“Për ça më ke përjashtuar? Ça kam bërë që jam përjashtuar, si qenka kjo rregullore. Po ti ke dy muaj që merresh me mua,” i tha Bardhi, Nikollës, por nuk kishte përgjigje meqë Edi Rama nuk e kishte parashikuar një pyetje të këtij lloji.
Ndërkohë, Kryetarit i Grupit Parlamentar të PS, Bledi Çuçi, dy ditë pas dhunës në Parlament dhe një ditë pasi deputeti socialist Vullneti Sina e fali deputetin demokrat Bledion Nallbati, bëri të ditur se Sina mund ta fal por jo dhe partia e tij kriminale, PS.
“Sot, në emër të Grupit Parlamentar të Partisë Socialiste firmosa kallëzimin penal për deputetin Bledion Nallbati për dhunën fizike të ushtruar në seancën e fundit ndaj deputetit Vullnet Sina.
Qëndrimi ynë është i qartë. Nuk do te tolerojmë asnjë akt dhune dhe refuzojmë këdo që e konsideron dhunën si mundësi për të shprehur mospajtimin.
Ftojmë organet ligjzbatuese të bëjnë punën e tyre dhe t’i shkojnë deri në fund ngjarjes së 30 tetorit në Parlament,” thotë kushëriri i Enver Hoxhës dhe kryetari i grupit të Edi Ramës, të cilt përveç mohimit të së drejtës së fjalës në parlament, për deputetët demokratë projektuan dhe burg.
Ndryshe, Komisioni i Etikës dje ka marrë vendim për përjashtimin me 10 ditë të 5 deputetëve të opozitës: Bledion Nallbatit, Flamur Noka, Edi Paloka, Albana Vokshi dhe Gazment Bardhi, ndërsa me 3 ditë është përjashtuar deputeti Saimir Korreshi. Ndërkohë Lefter Gështenja shpëtoi nga masa disiplinore.
