Parlamenti i Serbisë në kaos, rrahje mes deputetëve

Në seancën e sotme të Parlamentit të Serbisë, përfaqësuesit e pushtetit dhe ata të opozitës filluan me shtyrje dhe vazhduan me përleshje të ashpra. Përveç deputetëve, në këtë kaos politik u përfshinë dhe ministra të Qeverisë, ndërsa sigurimi i Parlamentit u mundua të shuante sherrin.

Deputetët opozitarë më herët kishin kërkuar që Parlamenti, në të cilin po diskutohej për buxhetin, të votojë për mosbesimin e Qeverisë pas aksidentit në Novi Sad, ku humbën jetën 15 persona. Megjithatë, pushteti e refuzoi atë propozim.

Gjatë transmetimit të seancës parlamentare nuk u pa qartë se si filloi incidenti, ndërsa zëri ishte i fikur, prandaj nuk mund të dëgjohej se çfarë po i thoshin deputetët njëri-tjetrit.

U pa që deputetët e pushtetit dhe të opozitës po ndaheshin nga sigurimi i Parlamentit, ndërkohë që goditeshin, tërhiqeshin, shtyheshin, lageshin me ujë dhe qëllonin njëri-tjetrin.

Çfarë tha Kryetarja e Parlamentit?

Kryetarja e Parlamentit, Ana Brnabiç, pas incidenteve e akuzoi opozitën për përpjekje për uzurpim të dhunshëm të pushtetit.

Ajo akuzoi deputetët opozitarë se, pas ndërprerjes së seancës, “shkulën mikrofonat” dhe “thyen ekranin” për të penguar vazhdimin e saj.

“Kështu duket liria e fjalës sipas interpretimit të tyre,” tha Brnabiç në një konferencë për media në hollin e Parlamentit, ndërsa deputetët opozitarë frynin bilbila dhe vuvuzela.

Brnabiç u shfaq para gazetarëve e shoqëruar nga deputetët e shumicës qeveritare, ndërsa rreth saj dhe mediave qëndronte sigurimi i Parlamentit. Pas sigurimit ndodheshin deputetët e opozitës.

Ajo tha se seanca kishte nisur me një minutë heshtje për viktimat e aksidentit në Stacionin Hekurudhor të Novi Sadit më 1 nëntor dhe se seanca duhej të ishte dinjitoze.

“Për fat të keq, kjo është gjithçka përveç nderimit dinjitoz për të ndjerët dhe familjet e tyre”, tha Bërnabiq.

Kryetarja e Parlamentit shtoi se do të përpiqet të vazhdojë seancën, ku po diskutohet për buxhetin si dhe ligje të tjera.

Çfarë thonë deputetët opozitarë?

Deputeti i Frontit të Gjelbër e të majtë, Radomir Lazoviç, deklaroi për televizionin N1 se incidentet nisën pasi ai tentoi të ngjiste një ngjitëse me mesazhin “Duart tuaja janë të përgjakura” pranë vendeve të ministrave në sallën e Parlamentit.

Ky është një slogan proteste, pasi javët e fundit është kërkuar përgjegjësi politike dhe penale për aksidentin në Novi Sad.

Ai tha se pas kësaj, atë e sulmoi ministri i Shëndetësisë, Zlatibor Lonçar, dhe pas një shtyrjeje me të, siç pretendon Lazoviç, ndodhi përleshja e përgjithshme në sallën e Parlamentit.

“Ne u përpoqëm ta qetësonim situatën, por na sulmuan gjatë gjithë kohës, policia dhe Partia Progresive Serbe bashkë”, tha Llazoviq. Ai shtoi se disa deputetë ishin lënduar.

Lidhur me incidentet që ndodhën në Parlament, ka reaguar edhe presidenti i Serbisë, Aleksandar Vuçiç.

“Pavarësisht faktit që jam i shqetësuar për sjelljen e egër të një pjese të deputetëve në Kuvendin Popullor, për dhunën e përditshme që ata ushtrojnë në mbarë vendin tonë, dua t’i qetësoj qytetarët dhe t’u them se ndaj sjelljes së tyre të pahijshme, mungesës së edukatës dhe arrogancës, do të përgjigjemi edhe me më shumë punë në të ardhmen,” tha Vuçiç në një video në Instagram.

Kur nisën incidentet?

Incidentet filluan rreth orës 12:30, pasi kryeministri i Serbisë, Milosh Vuçeviç, dhe ministrat e Qeverisë hynë në sallën e Parlamentit.

Ata morën pjesë në seancë pasi në rendin e ditës ishte propozimi i buxhetit për vitin 2025, të cilin duhej ta prezantonte Vuçeviç.

Deputetët opozitarë, pasi Vuçeviç dhe ministrat hynë në sallë, ngritën fletë ku shkruhej “Korrupsioni vret” dhe “Duart tuaja janë të përgjakura”, dhe duke bërtitur “Vrasës”.

Opozita kërkon shkarkimin e kryeministrit Milosh Vuçeviç dhe përcaktimin e përgjegjësisë politike dhe penale për aksidentin.

Deputetët opozitarë shfaqën gjithashtu një transparent me portretin e presidentit të Serbisë, Aleksandar Vuçiç, ku duart e tij ishin të ngjyrosura me të kuqe.

Ndaj kësaj reaguan deputetët e pushtetit duke ngritur fletë ku shkruhej: “Korrupsioni dhe hajnia janë emri juaj i mesëm”.

Një pjesë e deputetëve opozitarë më pas tentoi të afrohej te pjesa e sallës ku qëndrojnë ministrat e Qeverisë. Nuk mund të dëgjohej se çfarë po thoshin mes tyre.

Pas kësaj, kryeparlamentarja thirri sigurimin e Parlamentit që të ndërhynte. Ajo kërkoi nga deputetët të ktheheshin në vendet e tyre.

“Kjo është e turpshme për këtë institucion,” tha ajo.

Incident pati edhe në ballkonin e sallës parlamentare, ku gjithashtu ndërhyri sigurimi i Kuvendit.

Para se të caktohej pauza, kryeministri i Serbisë, Milosh Vuçeviç, me ftesë të kryetares së Kuvendit, filloi prezantimin e propozimit për buxhetin.

Fjalimi i tij u ndërpre nga opozita, e cila frynte bilbila dhe vuvuzela. Ndërsa Vuçeviç fliste, deputetët opozitarë qëndronin rreth tij dhe ministrave, duke mbajtur parulla me mbishkrimin “Duart tuaja janë të përgjakura.”

Kryetarja e Parlamentit, Ana Brnabiç, ndërpreu seancën, por incidentet në sallë vazhduan edhe pasi ajo caktoi një pauzë./RFE/