Parlamenti i Studentëve i UP, sot marshim kundër Asociacionit
Parlamenti Studentor i Universitetit të Prishtinës sot organizon një marshim kundër themelimit të Asociacionit të komunave me shumicë serbe.
“Më 15 shkurt të këtij viti shënojmë 53 vjetorin e themelimit të Universitetit të Prishtinës “Hasan Prishtina”, universitet ky që përgjatë historikut gjysëm shekullor, përveçse tempull i dijes, ka shërbyer edhe si vend i rezistencës. Historia e Universitetit pashmangshëm është e lidhur ngushtë me historinë e vendit tonë. Kujtojmë këtu rolin kyç të pararendësve tanë në protestat e viteve 1968, 1981 e 1997 që kulmuan me çlirimin dhe pavarësinë e Kosovës. Rreth 24 vite pas përfundimit të luftës së fundit e 15 vite pas shpalljes së pavarësisë, Kosovës sërish po i cenohet sovraniteti e integriteti territorial i saj. Ndonëse në rrethana krejtësisht të ndryshme, përsëri është i domosdoshëm mobilizimi e organizimi studentor për të kundërshtuar një të keqe që po provohet të instalohet brenda shtetit tonë,” shprehet Parlamenti i Studentëve të Uiniverstetit të Prishtinës “Hasan Prishtina” përmes një njoftimi duke shtuar se marshimi fillon në orën 16:00 para Bibliotekës Kombëtare “Pjetër Bogdani”.
Asociacioni, sipas Parlamentit të Studentëve një etnik, është në kundërshtim me Kushtetutën e Republikës së Kosovës, sepse Asociacioni i komunave me shumicë serbe nuk do të thotë më shumë të drejta për komunitetin serb, por më shumë ndikim të Serbisë mbi territorin e Kosovës.
“Serbia ka kryer gjenocid në Kosovë për të cilin ende nuk ka kërkuar falje. E kaluara në vendet e rajonit na ka dëshmuar që asociacioni do të thotë autonomi e cila më pas ka shpier në luftë. Në vend se të flasim lidhur me marrëveshjen e cila parasheh njohjen reciproke të diplomave universitare në mes Kosovës dhe Serbisë, sot flitet vetëm për asociacionin një etnik që cenon stabilitetin dhe paqen e shtetit tonë,” thekson përmes njoftimit Parlamenti i Studentëve të Universitetit të Prishtinës .
Në fund, Parlamenti i Studentëve të Universitetit të Prishtinës fton të gjithë qytetarët e Kosovës, pavarësisht bindjeve politike, që t’i bashkohen marshimit kundër Asociacionit një etnik.
