Parlamenti i Suedisë miraton marrëveshjen ushtarake kontroverse me SHBA

Parlamenti i Suedisë ka miratuar marrëveshjen ushtarake kontroverse për bashkëpunim me Shtetet e Bashkuara. Marrëveshja rregullon kushtet specifike të prezencës ushtarake amerikane në Suedi.

Duke folur për rëndësinë e Marrëveshjes, televizioni suedez SVT, citoi ministrin e Mbrojtjes, Pål Jonson, i cili tha se do të përmirësoj dukshëm kushtet për mbështetjen amerikane gjatë krizës ose luftës.

Në muajin dhjetor 2023, Stockholmi dhe Washingtoni u dakordësuan për Paktin e Mbrojtjes, me të cilin ushtarëve amerikanë u lejohet shfrytëzimi i 17 objekteve ushtarake në Suedi, duke përfshirë aeroportet, portet detare dhe objektet e forcave tokësore. Marrëveshja lejon vendosjen e personelit ushtarak amerikan si dhe organizimin e stërvitjeve ushtarake.

Kritikët kanë shprehur shqetësimin se Marrëveshja nuk merret me vendosjen e armëve bërthamore. Qeveria e Suedisë ka bërë të ditur se është konfirmuar qëndrimi i Stockholmit për ndalimin e pranisë së armëve bërthamore në vend gjatë paqes, dhe ai do respektohet.

Suedia, e cila me vite të tëra ishte ushtarakisht neutrale, ka aplikuar për anëtarësim në NATO së bashku me Finlandën fqinje pas pushtimit rus të Ukrainës dhe iu bashkua Aleancës perëndimore të mbrojtjes më 7 mars.