Parlamenti nuk i voton dot projektligjet, Veseli e quan “bojkot të pashpallur”

Sot seanca e Parlamentit të Kosovës ka filluar me kërkesën për mocion procedural, në mënyrë që të diskutohet e më pas të miratohet një rezolutë për dialogun me Beogradin.

Deputeti nga radhët e PSD-së, Visar Ymeri, propozoi që si pikë e parë e rendit të ditës të futet debati parlamentar lidhur me dialogun Kosovë-Serbi.

Fjala e tij u ndërpre disa herë nga kryesuesi i seancës.

Propozimin e Ymerit e përkrahën deputetët nga LDK-ja dhe ish-partia e tij, Lëvizja Vetëvendosje.

Por, lidhur me urgjencën e propozimit të Ymerit, u tall shefi i Grupit Parlamentar të PDK-së, derisa për AAK-në ky propozim vetëm tenton që të zbehë vendimin për liberalizim të vizave.

Mirëpo, në pajtim me kryetarët e grupeve parlamentare u vendos që propozimi i Ymerit të futet në votim pas përfundimit të pikave që ishin paraparë në rendin e ditës.

Vazhdimi i seancës u bë i pamundur në momentet kur u hodhën në votim amendamentet e Projektligjit për trajtimin e ndërtimeve pa leje, të cilat ishin propozim i Listës Serbe.

Mosvotimi i këtyre amendamenteve çoi në ndërprerjen e seancës. LDK-ja vazhdon të mos marrë pjesë në votime, duke vënë në pah mungesën e numrave të koalicionit qeverisës.