Parlamenti/ Rrëzohet dekreti i Presidentit për buxhetin

Me 76 vota kundër dhe 22 për, Parlamenti rrëzoi dekretin e Presindetit për kthimin e buxhetit në parlament.

Gjithçka ishte e qartë me të filluar seanca në orët e pasditës, kur fjalën e mori ministri Arben Ahmetaj. Duke sulmuar Presidencën ndërsa mori shkas nga përmbajtja e Dekretit, ishte e qartë se mazhoranca e Edi Ramës e konsideron këtë si akt politik i cili nuk ka lidhje me buxhetin. Ahmetaj në foltoren e parlamentit i bëri eko çdo pike dhe presje të Ilir Metës, madje edhe përdorimin e gabuar, sipas tij, të Nenit 59, që në këtë rast tha nuk ka lidhje fare.  Ndryshe, në deklaratën e Presidencës, ku njoftohej kthimi i buxhetit në parlament, thuhej:“Presidenti i Republikës SH.T.Z. Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij. Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik”