Parlamenti voton për shkarkimin e Presidentit Meta! Presidenca: Vendim qesharak i landfillit parlamentar!
Me 104 vota për, 7 kundër dhe 3 abstenime, Parlamenti i Shqipërisë ka votuar për shkarkimin e Presidentit të Republikës, Ilir Meta.
Shtatë deputetë nuk ishin të pranishëm në sallë: Ambra Borova, Rudina Hajdari, Enada Kapllani, Korab Lita, Jetmira Raboshta, Olta Xhaçka dhe Fidel Ylli.
Menjëherë pas përmbylljes së këtij cikli propagandistik të Kryeministrit Edi Rama me figurën e mikut të tij Ilir Meta, ka reaguar zyra e Presidencës duke e konsideruar një vendim antikushtetues dhe qesharak i landfillit parlamentar.
Kryetari i Grupit Parlamentar të Partisë Socialiste, Taulant Balla, paralajmëroi se ky Vendim i parlamentit do të dërgohet brenda 5 ditëve në Gjykatën Kushtetuese dhe është kjo Gjykatë ajo e cila merr vendimi përfundimtar.
Reagimi i Presidencës:
Zero shqetësim nga vendimi antikushtetues dhe qesharak i landfillit parlamentar monist, që do të hyjë si rast studimor në historinë botërore të parlamentarizmit, se si një Kuvend pa opozitë, që edhe pse është shkarkuar me votë nga populli, voton për shkarkimin e një institucioni tjetër!
Asnjë surprizë nga tregtari i kufijve të Shqipërisë dhe të Kosovës, partnerët dhe vasalët e oligarkëve, mafia e inceneratorëve, grabitësit e votave, parave dhe të pronave të shqiptarëve, përfshi edhe torollakët e dobishëm, që nuk bënë gjë tjetër sot, veçse plotësuan edhe hapin e fundit të krimit të rëndë zgjedhor të 25 prillit.
Të paktën veç pensionit të përjetshëm, i siguruat edhe për këtë vit një palë pushime qyl! Bravo ju qoftë, që nuk dolët pa gjë nga kjo shëmti!
Presidenti i Republikës Sh.T.Z Ilir Meta është më i motivuar se kurrë për mbrojtjen e sovranitetit dhe integritetit të Shqipërisë nga çdo përpjekje e tradhëtarëve, bashkëpunëtorëve dhe tutorëve të tyre, që punojnë prej vitesh kundër vendit tonë, shqiptarëve dhe interesit kombëtar.
Një ftesë e sinqertë edhe për kolegët gazetarë: Merruni me gjëra serioze, zbardhjen, hetimin e plotë dhe dënimin e krimeve zgjedhore!
