Parlamenti zgjedh kryetaren e re të AMA, Basha: Harbutëri në dëm të Shqipërisë!
Pas zgjedhjes së kryetares së re të Autoritetit të Mediave Audiovizive, AMA, nga ana e Parlamentit të Shqipërisë përkundër thirrjeve të BE dhe OSBE, ka reaguar ashpër Kryetari i Partisë Demokratike, Lulzim Basha, duke theksuar se kjo nuk është forcë, po harbutëri në dëm të të gjithë shqiptarëve dhe të Shqipërisë.
“E ka fajin Europa” llomotit poshtë e lart, për të fshehur dështimin e tij dhe pengimin e Shqipërisë. Por sapo i jepet një shans për të vepruar në shërbim të interesave të vendit, sikurse kërkuan BE dhe OSBE, zgjedh të bëjë të kundërtën, duke hedhur poshtë thirrjen e partnerëve për të shtyrë në shtator votimin për AMA,” thekson Lulzim Basha në reagimin e tij përmes rrjetit social Twitter duke përfunduar:
“Kjo nuk është forcë, po harbutëri në dëm të të gjithë shqiptarëve dhe të Shqipërisë.”
Ndryshe, përkundër thirrjeve të Bashkimit Europian dhe OSBE-së për shtyrjen e vendimit për zgjedhjen e kryetarit të Autoritetit të Mediave Audiovizive për në muajin shtator me legjislaturën e re, Parlamenti i Shqipërisë sot ka zgjedhur Armela Krasniqin kryetare të re të AMA-s ndërsa kandidatja tjetër Alketa Dibra mori vetëm 9 vota.
