“Partizani”, Apeli i GJKKO liron nga burgu Jamarbër Malltezin

Lirohet nga burgu, dhëndri i Ish-Kryeministrit, Sali Berisha, Jamarbër Malltezi. Apeli i Gjykatës së Posaçme për Korrupsionin dhe Krimin e Organizuar, GJKKO, caktoi sot masën “arrest shtëpie” për Jamarbër Malltezi, bëri të ditur avokati Genc Gjokutaj.

Jamarbër Malltezi ishte në burg për çështjen “Partizani”, ndërsa akuzohet për korrupsion pasiv ndërsa për këtë çështje ndaj Berishës u caktua masa “detyrim paraqitje”.

“Gjykata shpalli vendimin, duke e miratuar për pjesën e zotit Berisha. Duke ndryshuar pjesën për Jamarbër Malltezi, duke caktuar masën e ‘arrestit të shtëpisë’. Kjo është një ‘gërvishtje’ sepse Jamabër Malltezi nuk ka asnjë lloj penaliteti. Që kjo çështje është politike, e bëj me dije dhe në këtë faqe të kallëzimit. Keni kallëzimin dhe regjistrimin brenda një dite. Për çështje të tilla, është e pamundur që brenda një dite të dorëzohet kallëzimi dhe të regjistrohet. Gjykimi dje u karakterizua nga një gjuhë e drunjtë e prokurorisë dhe një heshtje e gjykatës,” tha avokati Genc Gjokutaj.

Ndryshe, Gjykata e Posaçme e Apelit për Korrupsionin dhe Krimin e Organizuar urdhëroi lirimin nga ambientet e paraburgimit të hetuarin Jamarbër Malltezi, në rast se nuk mbahet për ndonjë shkak tjetër; Si dhe urdhërohet Prokuroria e Posaçme kundër Korrupsionit dhe Krimit të Organizuar, policia gjyqësore pranë saj, si dhe policia gjyqësore pranë Drejtorisë Vendore të Policisë Tiranë për ekzekutimin e këtij vendimi dhe kontrollimin e zbatimit të urdhrave të dhëna të hetuarit nga kjo gjykatë.