“Partizani”, Berisha: Ky proces politik erdhi pas kërkesës së diplomatëve amerikanë, Gabriel Escobar dhe Yuri Kim
Pasi Prokuroria e Posaçme ka mbyllur hetimet në lidhje me çështjen “Partizani” dhe i ka dorëzuar avokatëve të të pandehurve aktet, ka reaguar Kryetari i Partisë Demokratike, Sali Berisha duke e cilësuar proces politik i cili erdhi pas kërkesës së përsëritur të diplomatëve të korruptuar amerikanë, Gabriel Escobar dhe Yuri Kim.
“Unë informoj qytetarët shqiptarë se sot, Edi Rama, kreu i narkoshtetit shqiptar, Altini i pyetjes 1 milion euro dhe tre apartamenteve sipas tij si rrogëtar shteti, ish-xhelati i policisë sekrete shqiptare me vila dhe ndërtime, Kraja, ndrikulla e bandave të rrezikshme, simotra biologjike e Taulant Ballës, Mellonai, dorëzuan avoketërve të mi në mënyrë përfundimtare dosjen për klubin Partizani me akuzën për korrupsion pasiv për Sali Berishën dhe të njëjtën, shtuar dhe larje parash për dhëndrin e tij, Jamarbër Malltezi.
Ky akt i paprecedent, i bazuar në një piramidë fund e krye mashtrimi, falsifikimi dokumentesh, manipulimi dhe fshehje të dokumenteve zyrtare, do gdhendet në muret e kohës si një nga veprat më të shëmtuara të narkoshtetit në Shqipëri,” thekson Sali Berisha duke shtuar se në këtë piramidë, prokurorët politikë të prokurorisë private të Edi Ramës kanë rreshtuar duke i shumëzuar për dy të gjitha mashtrimet e renditura në dokumentin me të cilin ata shpallën nën hetim Sali Berishën dhe Jamarbër Malltezin.
“Dhe, vendosën në shkelje të rëndë të Kushtetutës, Konventës Europiane të të Drejtave të Njeriut dhe ligjeve të vendit, arrestin e tij në shtëpi, ndalimin e komunikimit të tij me çdo person tjetër përveç familjarëve të afërt dhe ndalimin e ndjekjes së punimeve të parlamentit si deputet i zgjedhur nga qytetarët, ndonëse pa asnjë masë dënimi siç kërkojnë ligjet për këtë vendim.
Ky proces politik kundër Sali Berishës erdhi pas kërkesës së përsëritur të diplomatëve të korruptuar amerikanë Gabriel Escobar dhe Yuri Kim.”
Kësaj të fundit, tha Kryetari i Partisë Demokratike, Sali Berisha, i ka denoncuar publikisht në mënyrë të përsëritur aktet e saj korruptive.
“Pas kërkesës publike të Edi Ramës në Asamblenë e partisë së tij në vitin 2022, që Sali Berisha të persekutohej, të ndiqej, të penalizohej.
Por sot, pas katër vitesh hetimesh shterruese, ata që projektuan, ata që u angazhuan, që porositën, që ndërmorën hetimin ndaj Sali Berishës dhe dhëndrit të tij, nuk gjetën asnjë provë, asnjë fakt, asnjë dokument, asnjë dëshmi të vetme që të fajësojë Sali Berishën dhe Jamarbër Malltezin.
Kështu që atyre do u mbetet turpi njëherë e përgjithmonë për aktet e tyre.”
Ndryshe, sot avokatët e të pandehurve për çështjen ” Partizani”, mes tyre ish-kryeministri Sali Berisha, kanë firmosur përfundimin e hetimeve nga Prokuroria e Posaçme dhe kanë marrë në dorëzim aktet hetimore.
Të pandehurit kanë 10 ditë kohë afat për të bërë pretendimet në lidhje me aktet e dosjes hetimore.
Pas përfundimit të afatit çështja dërgohet për gjykim në GJKKO.
Për seancën paraprake, me anë të një shorti caktohet gjyqtari.
