Pas 115 ditë negociatash, LVV-LDK më larg se kurrë më parë!
Paaftësi për të negociuar ose mosgatishmëri për ndarjen e pushtetit janë këto dy cilësime që mund ti vihen sot mbi shpinë si Lëvizjes Vetëvendosjes ashtu dhe LDK-së, të cilat 115 ditë pas fitores së 6 tetorit janë larg njëra tjetrës si kurrë më parë.
Konstituimi i Parlamentit të ri të Kosovës që shumë prej tyre e konsideruan si hapin e parë të suksesshëm, ishte fillimi i fundit të këtij koalicioni. Madje, ky fillim i fundit u bastardua aq shumë, sa qytetarët e Kosovës nuk arritën të dëgjojnë asnjë fjalë mbi dallimet programore dhe kompromiset rreth një Programi të përbashkët, por e gjitha u fokusua tek postet ministrore, Kryetari i Parlamentit dhe Presidenti.
Ndonëse nga Lëvizja Vetëvendosje kemi një shfajësim mbi situatën e krijuar sepse ajo dha gjithçka nga vetja e vetë, emrat e ministrave të publikuar nga kandidati për Kryeministër Albin Kurti, tregojnë se Vetëvendosje është po aq e papërgatitur sa LDK edhe pse janë detajet që i bëjnë këto dallime.
Mund të besohet se Lëvizja Vetëvendosje ishte e gatshme për marrëveshje të koalicionit qeverisës edhe kur LDK kishte kërkesa të çuditshme për poste ministrore si ai Brendshëm, dhe u paraqitë e ngurtë për shkak të konjukturave në parti, që e quan në hulli të gabuar gjithë rrjedhën e negociatave. Por tashmë është e qartë se edhe Lëvizja Vetëvendosje nuk u fut në negociata me ide të qarta qeverisëse. Nga pesë propozime ministrore tre prej tyre jo vetëm që nuk kanë lidhje me Vetëvendosje por ato mund të kuptohen pjesë e kësaj Lëvizje vetëm nëse ajo ndryshon misionin e saj për të cilën është formuar.
Të bësh një opozitë të fortë si Lëvizja Vetëvendosje me qëllim të ardhjes në pushtet me synime parimore që i munguan Kosovës që nga negociatat për përcaktimin e statusit me Presidentin Ahtisari, dhe nga pesë emra të propozosh dy prej të cilëve nuk kanë as aromë vetëvendosjeje, kjo vënë në dyshim jo vetëm aftësinë qeverisëse të Lëvizjes Vetëvendosje. Dhe jo vetëm kaq!
Vjellja që bënë disa prej eksponentëve të kësaj partie kundër LDK-së ndërkohë që po zhvilloheshin negociatat për koalicionin qeverisës, dëshmon se me Dardan Molliqajn nuk kanë shkuar të gjithë ata që nuk i duhen Lëvizjes Vetëvendosje!
Nga ana tjetër LDK si parti pa lider me vdekjen e Ibrahim Rugovës, la një shije të hidhur jo vetëm për ata që i besuan Vjosa Osmanit Kryeministre dhe i dhanë votën. Një parti e krijuar me “durimin” që kërkon me patjetër ministrinë e Brendshme, është një idiotizëm “par exellence”.
Çdo njohës i rrethanave politike e kishte imagjinuar një ministër të Ekonomisë ose Financave për derisa LDK është pjesë e qeverisë, por ata nuk e zunë në gojë fare, madje Isa Mustafa si profesor dhe studiues i fushës nuk reagoi si për Besnik Bislimin ashtu dhe Rozeta Hajdarin kur Albin Kurti tha se do ti besojë Financat përkatësisht Ekonominë e Kosovës.
Albulena Haxhiu mund të jetë ministrja më e suksesshme e Drejtësisë në historinë e Kosovës, por është koha që këtë dikaster ta udhëheqë LDK në mënyrë që të zbardhen vrasjet politike të pasluftës në Kosovë, ku në pjesën më të madhe goditën radhët e Lidhjes Demokratike të Kosovës.
Nëse negociatat për marrëveshjen e koalicionit qeverisës dështojnë për shkak të postit të Presidentit, Isa Mustafa duhet të heqë dorë nga politika një orë e më parë. Të gjitha shtetet e Ballkanit, me përjashtim të Serbisë, postin e Presidentit e kanë thjeshtë një vend pune, dhe për ata që nuk e kuptojnë, sot në fron e kanë njeriun e vetëm që u zgjodhë President i Kosovës me 2/3 e votave, dhe i cili u shua politikisht nga momenti kur u ulë në atë fron! Dhe në fund, nëse Lëvizja Vetëvendosje ka konsumuar 115 ditë me Isa Mustafën me këtë mendësi politike, dështimi i ndërtimit të koalicionit me LDK do të jetë fitorja më e madhe e Kosovës!
