Pas 16 Majit…

nga Agim Popoci

Iku dhe 16 Maji me shumë pyetje pa përgjigje dhe me një epilog që nuk zgjidhi asgjë ndër demokratë, madje as çështjen e zgjedhjes së kryetarit të ri ndonëse u caktua data e zgjedhjeve, 13 Qershor!

16 Maji nuk ishte dita kur demokratët prisnin ardhjen në pushtet, por dita kur duhet ta dëgjonin liderin e tyre që i qëndruan besnik për 8 vjet, se çfarë pas 25 Prillit dhe cila është e ardhmja e tyre; Dita, kur duhet të dëgjonin përgjigje edhe për Grupin, i cili që nga dita e parë e largimit të Doktori nga kryesimi i Partisë Demokratike, e deri më 15 Maj akuzonin Lulzim Bashën, sepse thjeshtë shumica e demokratëve besuan Kryetarin e tyre dhe jo Grupin!

Dhe jo vetëm kaq! Impianti i propagandës komuniste, çdo vendim të Kryesisë, Këshillit Kombëtar ose Lulzim Bashës, deri më 15 Maj e siglonte me Sali Berishën, duke e lënë Partinë Demokratike pa lider dhe Kryetarin e saj pa fuqinë e tij vendimmarrëse.

Dhe, më 16 Maj, sërish as demokratët dhe as kundërshtarët e Lulzim Bashës nuk morën përgjigje për asnjë nga akuzat e ngritura pas 25 Prillit edhe pse Kryesia dhe Këshilli Kombëtar i kishte miratuar të gjitha!

Është e papërgjegjshme të thirret Kryesia dhe Këshilli Kombëtar vetëm për t’iu thënë se “e gjithë struktura e PD funksionoi dhe ajo që pamë është se u përballëm me një strukturë kriminale të blerjes së votës”. Nëse votat u blenë, dhe kjo del nga goja e liderit pa  një analizë rast pas rasti, ose qark pas qarku, atëherë  kanë dështuar strukturat e PD dhe jo Edi Rama me regjimin e tij, që gjithmonë kanë vepruar në këtë mënyrë! Dhe, mos t’ju mbyllësh gojën atyre që llapin poshtë e lartë, madje edhe në KAS se demokratët janë blerë për 50 mijë lekë edhe nga  një njëri si Tom Doshi, është shumë më e turpshme se sa të humbësh sepse kjo dëshmon paaftësinë tënde ose mosbesimin që ka qytetari në premtimet tuaja dhe kur është demokrat!

Zhvleftësimi i Komisionit të Vlerësimit të kandidaturave për deputetë nga Kryetari i PD, Lulzim Basha! Për shumë nga kandidaturat që nuk kaluan në Komision dhe u rikthyen nga Lulzim Basha u përfolën si njerëzit e Doktorit. Duke i kthyer përgjigje atyre që akuzojnë, Basha e kishte detyrim të sqarohet për këtë vendim, jo si i akuzuar por si lider i cili merr vendime në të mirë të partisë dhe fitores së saj në zgjedhje edhe me njerëzit e Doktorit ndonëse kishte një as të fortë në mëngë: Heshtjen e të gjitha strukturave edhe kur ata emra kaluan për tu miratuar në listat e deputetëve! Fatkeqësisht, kjo akuzë e rëndë, në mungesë të përgjigjes ka dëmtuar rëndë procesin zgjedhor dhe mbështetjen e demokratëve më 25 Prill. Dhe, kjo kërkonte përgjigje të paktën më 16 Maj!

Në fund, ata që kërkuan dorëheqjen e Kryetarit nga arena të ndryshme Anti-PD, morën përgjigjen më të shëmtuar të mundshme. Nënshtrimi ndaj zhurmës së tyre nuk është dobësi, është idiotizëm i cili pasoi një vendim edhe më idiot se dorëheqja, që zgjedhjet për Kryetar të mbahen më 13 Qershor pa një analizë të detajuar.

Sot, pas 16 Majit, ndonëse impianti i propagandës komuniste u zgjua me një SuperBashë që na i paska bërë të gjitha, popo ai Bashë për të cilin propagandonin deri më 15 Maj se nuk e pyet Doktori për asgjë, PD fatkeqësisht vazhdon të jetë pa lider! Një lider, i cili pavarësisht unitetit dhe rrethanave të krijuara si dhe propagandës komuniste shumë të fortë, të gjithë atyre që deri më 15 Maj flisnin poshtë e lartë se vendimet i merr Doktori, t’u thotë në sy se ata duhet ti kërkojnë dorëheqje Doktorit!

Dhe, të gjithë të tjerëve, t’u bëhet e qartë se me përfundimin e një analize të zgjedhjeve të 25 Prillit dhe jo kur i duhet Edi Ramës, edhe Kryetari i PD do të thotë fjalën e vet!