Pas 25 Prillit/ Nëse Shkodra është bastion i PD, çfarë është Korça?!

Duke e pranuar në krye të herës se e diela e 25 Prillit ashtu siç e tha edhe raporti paraprak i OSBE/ODIHR ishte turpi i demokracisë, me shit-blerje të votës, kërcënime dhe presione të nëpunësve, si dhe 77.679 votat e pavlefshme, rezultati i PD në Qarkun Kukës me 62.27 për qind të votave të fituara dëshmon se rezultati përfundimtar varet nga qëllimi që i jep vetes dhe jo sa vjedh dhe blenë kundërshtari.

Rast tipik është Shkodra! Shkodra që deri më sot u konsiderua si bastioni i Partisë Demokratike, në zgjedhjet e 25 Prillit prodhoi një rezultat që nuk ka lidhje as me bastion dhe as me PD. Madje risitë që u quajtën partitë që dolën nga të pakënaqurit e Lulzim Bashës, rezultuan ashtu siç ishin akuzuar, hyzmeqarë të Edi Ramës. Dhe fenomeni “Tom Doshi” për dallim nga qarqet tjera nga Tirana në Gjirokastër nuk është se mori në shportën e tij të votave sasi të madhe të votave që bëjnë ndryshimin.

Sot, nëse me 5 mandatet e fituara Shkodrën dikush e çon nëpër mend të vazhdoj ta quaj bastion i Partisë Demokratike, me 5 mandatet e fituara ku PS fitoi 3 mandate, Tom Doshi 2 dhe LSI 1, si duhet të konsiderohet Korça me po të njejtin numrin e mandateve dhe një pasqyrë të ngjashme të ndarjes së votës ideologjike ku PD ka marrë 5 mandate ndërsa PS 6 mandate.

Por, sot nuk është koha për akuza por për reflektim dhe këtë më mirë se rezultati i vitit 2021 krahasuar me atë të vitit 2017 na jep një përgjigje më të qartë për Shkodrën ku as pushtetin lokal nuk e kanë socialistët.

Në zgjedhjet e 25 Prilli PD në Shkodër mori 47.209 vota ose 43.8 për qind, aty ku në vitin 2017 mori 40.763 vota ose 37.06 për qind.

PS që mori 30.296 vota ose 28.11 për qind pësoi një rënie krahasuar me vitin 2017 ku mori 39.247 vota ose 35.68 për qind, por rënie kishte dhe LSI e cila më 25 Prill mori 10.102 ose 9.37 për qind dhe në vitin 2017 kishte 12.737 vota ose 11.58 për qind.

Ku shkuan këto vota të majta?! Përgjigjen e jep Tom Doshi me partinë e tijë PSD e cila mori më 25 Prill 16.426 vota ose 15.24 për qind deri në vitin 2017 kishte 13.226 vota ose 12.02 për qind.

Kopilat e Edi Ramës mund të kenë qenë hendikap i madh për PD në këto zgjedhje por ato kanë pak më shumë se 3.000 vota dhe nuk është se kishin rol të madh në këtë drejtim. Madje shkodrania e madhe Jozefina Topalli u degjenerua edhe krahasuar me Tomën! Lëvizja e Jozit për Ndryshim mori vetëm 1.389 vota ose 1.29 për qind ndërsa risitë e tjera të Edi Ramës mund të konsiderohen vetëm trupi i demokracisë. Bindja Demokratike e Astrit Patozit mori 1.005 vota ose 0.93 për qind, Lëvizja Demokratike Shqiptare e Myslim Murrizit 229 vota ose 0.21 për qind ndërsa Nisma Thurrje e Rudina Hajdarit 518 vota ose 0.48 për qind.

Për ta kuptuar turpin e madh të Shkodrës në zgjedhjet e 25 Prillit me 5 mandatet e fituara përballë 6 mandateve që mori e majta mund të shërbej vetëm Korça.

Në Qarkun e Korçës PD mori 50.479 vota ose 40.77 për qind që përkthyer në mandate janë 5, deri sa në vitin 2017 kishte 42.177 vota ose 32.51 për qind që përkthyer në mandate janë 4!

PS në Korçë pësoi rënie me 60.543 vota ose 48.9 për qind që gjithsesi në mandate ishte 6 sikur se në vitin 2017 kur kishte 62.787 ose 49.39 përind; Por duhet harruar se në vitin 2017 ishte e pakënaqura me Edi Ramën, Libra, e cila mori 1.809 vota ose 1.39 për qind

LSI në Korçë, të dielën mori 8.485 vota ose 6.85 për qind ndërsa në vitin 2017 kishte 19.465 vota ose 15 për qind

Në Shkodër Tomd Doshi ishte plangprishës por kjo mund të thuhet edhe në Korçë ku mori 1.268 vota ose 1.02 për qind deri sa në vitin 2017 kishte vetëm 60 vota ose 0.05 për qind. Por PD mori ashtu si në Shkodër 5 mandate!

Në fund, me shit-blerje të votës, kërcënime dhe presione të nëpunësve Edi Rama nuk e kursej Shkodrën, por për degdisjen e Partisë Demokratike në 5 mandate, fajtor janë vetëm drejtuesit e PD si në Shkodër ashtu dhe Tiranë! Vota e partisë nuk projektohet në Facebook me “like” ku lidershipi i PD ishin të jashtëzakonshëm për 30 ditë fushatë, por në terren, aty ku për 8 vjet shkodrani u përçmua, u dengirua dhe u varfërua shumë më keq se në vitin 1945 kur Mehmet Shehu jepte urdhër: “Ti merret arma ose shpirti!”

Në vitin 2021 Edi Rama me Tom Doshin e projektuan dhe realizuan fitoren më të shëmtuar për të cilën kishte frikë dhe Kisha Katolike që bëri thirrje për kujdes ndaj shit-blerjes së votës; Sepse thjeshtë, Edi Rama kishte një projekt ndryshe për shkodranët, pas vuajtjes dhe mjerimit 8 vjeçar që i dhuroi:

“Ti blehet shpirti!”