Pas aksidenteve fatale, banorët Kukësit në protestë

Pas disa aksidenteve fatale në rrugën hyrëse të qytetit që lidh Kukësin me Rrugën së Kombit, ku së fundi një 51 vjeçar humbi jetën pasi u godit nga një automjet, qytetarët e shqetësuar për sigurinë në rrugët e qytetit të Kukës, kanë protestuar mëngjesin e sotëm duke kërkuar masa të menjëhershme për shmangien e aksidenteve.

Protestuesit për disa minuta bllokuan rrugën në shenjë sensibilizimi duke kërkuar masa për rritjen e sigurisë dhe paralajmëruan se do të intensifikojnë protestat nëse nuk ndërhyhet për përmirësimin e kushteve të sigurisë rrugore.

Protestuesit apeluan që shteti të ndërhyjë për të parandaluar aksidente të tjera, pasi situata është bërë shqetësuese ndërsa vendi ku ndodhi aksidenti është një zonë me fluks të lartë të automjeteve dhe bizneseve, ku drejtuesit shpesh abuzojnë me shpejtësinë.