Pas aksionit në Veri/ Haradinaj: Vuçiç po mbron krimin!

Kryeministri i Kosovës, Ramush Haradinaj, tha se është i pakuptimtë reagimi i presidentit Aleksandar Vuçiç për aksionin e sotëm në veri të vendit, dhe një reagim i tillë është mbrojtje e krimit.

“Është një operacion në shkallë të vendit, është i drejtuar ndaj personave që janë të involvuar në vepra të paligjshme. Është krejtësisht zbatim i ligjit. Policia e Kosovës ka zbatuar obligim ligjor. Në Zubin Potok ka pasur tentativa prej trafikantëve që me armë zjarri ta pengojnë këtë operacion. Policia e Kosovës është e aftë ta kryejë detyrën e vet. Është për admirim puna e Policisë së Kosovës. Ne nuk mundemi të shkojmë në BE duke e përkrahur krimin. Është i padrejtë si reagim, dhe është e pakuptimtë me u vë në mbrojtje të krimit”, tha ai.

Sa i përket arrestimit të një shtetasi rus, gjatë operacionit të sotëm, Haradinaj tha se megjithë se respektojnë imunitetin e  përfaqësuesve të organizatave ndërkombëtare, kur një person rrezikon vendin, atëherë duhet të zbatohet ligji në bazë të konventave ndërkombëtare.

“Dihet cila është agjenda e Rusisë ajo e destabilizimit dhe ne jemi të vëmendshëm për këto agjenda duhet punuar kundër këtyre agjendave dhe jemi të suksesshëm, nuk ka vend që nuk zbatohet ligji ne Kosovë”, tha në fund Ramush Haradinaj.