Pas aktgjykimit të Gjykatës Kushtetueses, sot Parlamenti i Kosovës zgjedh Nënkryetarin serb
Pas zbardhjes së aktgjykimit të Gjykatës Kushtetueses, Parlamenti i Kosovës sot do të vazhdojë seancën konstituive ku në rend të ditës është zgjedhja e Nënkryetarit të Parlamentit nga radha e komunitetit serb.
Ndryshe Gjykata Kushtetuese e Republikës së Kosovës shpalli aktgjykimin e plotë me të cilin ka konstatuar se Seanca Konstituive e Parlamentit të Kosovës, e filluar më 15 prill 2025, nuk ka përfunduar si rezultat i moszgjedhjes së nënkryetarit të Kuvendit nga radhët e komunitetit serb.
Në vendimin e publikuar, Gjykata thekson se Parlamenti nuk është konstituuar në pajtim me nenin 66 dhe nenin 67 të Kushtetutës së Republikës së Kosovës, të cilat përcaktojnë zgjedhjen dhe mandatin e Kryetarit dhe Nënkryetarëve të Kuvendit.
Gjykata ka urdhëruar që Seanca Konstituive të përfundojë brenda 12 ditëve nga hyrja në fuqi e këtij aktgjykimi, në përputhje me afatin kushtetues dhe me aktgjykimet e mëhershme në rastet KO193/25 dhe KO196/25.
Po ashtu, Gjykata Kushtetuese ka kërkuar nga të gjithë deputetët e Parlamentit që gjatë procesit të zgjedhjes së nënkryetarit nga komuniteti serb të ushtrojnë funksionin e tyre kushtetues “në interesin më të mirë të Republikës së Kosovës” dhe në përputhje me Kushtetutën dhe Rregulloren e Kuvendit.
