Pas akuzave, sqarime për analfabetët: Firmat verifikohen më datë 11 dhjetor!
Pas akuzave nga Sekretari i Përgjithshëm, Gazment Bardhi dhe Kryetari i PD, Lulzim Basha, për mënyrën e depozitimit të firmave të delegatëve dhe kërkesën për mbledhjen e Kuvendit Kombëtar të PD, sot deputeti i PD Flamur Noka dhe dy ish-deputetët Gent Strazimiri dhe Arben Ristani kanë sqaruar analfabetët funskional dhe shkelësit dezhurn të Statutit të PD se mandatet për mbledhjen e Kuvendit Kombëtar do të verifikohen më datë 11 dhjetor kur dhe themelohet komisioni që verifikon mandatet ndërsa për ata që kanë kuriozitet të shohin firmat, mund t’i shohin ato në zyrën e Edi Palokës, i cili është dhe kryetari i Këshillit Kombëtar, organit të dytë më të lartë në PD.
“Siç jeni në dijeni shumica absolute e PD kanë firmosur kërkesën për mbledhjen e Kuvendit më 11 dhjetor. Ky është organi më i lartë statutor që drejton PD. Ajo verifikohet sipas një procedure fikse, standarde. Vetë Kuvendi miraton komisionin e verifikimit të mandateve. Edhe nëse nuk vetëmblidhet Kuvendi nuk verifikohet nga askush tjetër, sepse të gjithë janë vartësit e tij. Si i tillë edhe Kuvendit i datës 11 dhjetor do të verifikohet nga komisioni që do të miratohet në sallë. Kemi paraqitur për transparencë numrin e firmave që janë mbledhur nga delegatët e PD. A ishte detyrim statutor? Jo. E kemi bërë për transparencë. I kemi dorëzuar në organin e dytë më kryesor të PD, Këshillin Kombëtar. Kush ka kuriozitetin mund të shohë në zyrën e kreut të Këshillit të PD. Kushdo e ka 20 hapa larg zyrën e zoti Paloka e të shohë janë mbledhur apo jo firmat, jo të verifikojë, atë e bën Kuvendit vetë,” tha Gent Strazimiri ndërsa deputeti Flamur Noka akuzave të Lulzim Bashës iu përgjigj me akuza duke e cilësuar si ministrin e 20-të të Ramës.
“Pengkryetarit i kanë mësuar një gjë, që mënyra më e mirë për t’u mbrojtur është të sulmosh. Nuk ka demokrat në Shqipëri që nuk e di se kush është pengu, kush i ka shërbyer dhe i shërben Ramës. Nuk ka demokrat që nuk e di se kush i dogji dhe shkatërroi interesat e demokratëve. Të gjitha këto qartësisht e paraqesin zotin Basha një peng kryetar. Qeveria jo 19 ministra, por 20, kë një ministër të shuarjes së opozitës, Lulzim Basha që paguhet nga qeveria e Edi Ramës. Është një pakicë, demokratët kanë shprehur vullnetin e tyre. Është një shumicë absolute. Mbrëmë janë dorëzuar 4200 firma, sot janë mbledhur dhe 150 të tjera, po vazhdojnë të tjerat. Të jeni të sigurt që shifrat do kalojnë 5000. Është një shumicë absolute. Paniku që e ka zënë duket tek histeria si flasin dhe sulmojnë. Asgjë nuk e ndal vullnetin e demokratëve, as pengkryetari, as ustai i tij që e ka kapur peng.
E para, z. Basha është palë, sekretari është mëkëmbësi dhe është palë. Shumica nuk mund të paraqitet në rresht tek pakica. Ne për transparencë ndaj demokratëve, nga shoqërisë shqiptare ne depozituam tek i vetmi institucion legjitim i kësaj force. Që nga sek i përgjithshëm dhe poshtë, sekretariati nuk janë zgjedhur konform statutit. Statuti i PD-së parashikon që sekretari i përgjithshëm dhe nënkryetarët të zgjidhen me votim me dy kandidatë. Janë ilegjitimë sepse nuk janë zgjedhur me kandidatura alternative dhe nuk janë zgjedhur me votë të fshehtë. I vetmi institucion legjitim është Këshilli Kombëtar.”
Ndërkohë Gent Strazimiri saktësoi se sikur në cilëndo prej zyrave të kësaj partie të kishin vajtur firmat, verifikimin e bën Kuvendi.
“Gjëja e parë që bën është verifikimi mandateve. Cilido që thotë se verifikimi bëhet këtu gënjen në mënyrë të paturpshme. Firmat janë në godinë për transparencë dhe jo verifikim. Dhe sikur firmat të kishin shkuar në zyrën e Lulzim Bashës, ai nuk mund ta bënte verifikimin,” tha Strazimiri ndërsa Ish-Sekretari i Përgjithshëm i PD, Arben Ristani, duke përgënjeshtruar Sekretarin aktual Gazment Bardhi se ai organizon Kuvendin Kombëtar pasi që Kuvendi është ndryshe nga ai i partisë.
“Organizimi i Kuvendit është ndryshe. Ka dy mënyra për mbledhjen e Kuvendit, një mënyrë mblidhet nga kryesia e partisë, e një formë tjetër nga anëtarët. Ndaj është e parashikuar që çdo Kuvend, sido në botë ndodh kështu. Kuvendet vetëkontrollohen, askush nuk i komandon Kuvendet. Ajo që ka ndodhur është në respekt të institucioneve të partisë, e për transparencë është dorëzuar në seli,” sqaroi Ish-Sekretari i Përgjithshëm i PD, Arben Ristani.
