Pas arrestimit të gjyqtares Enkeleda Hoxha, KLGJ garanton vijimin e punës…

Pas arrestimit të gjyqtares së Krujës, Enkeleda Hoxha nga Struktura e Posaçme Kundër Korrupsionit dhe Krimit të Organizuar, SPAK, ka reaguar Këshilli i Lartë Gjyqësor, KLGJ, duke garantuar opinionin publik se ka marrë të gjitha masat për vijimin e veprimtarisë së gjykatës.

Ndryshe, për gjyqtaren e Krujës, Enkeleda Hoxha, e cilësuar si një nga gjyqtaret më problematike, ILD ka kërkuar shkarkimin nga detyra, pasi në kundërshtim me ligjin ka liruar disa nga emrat e njohur të botës së krimit.

Njoftim:

Këshilli i Lartë Gjyqësor, duke marrë në konsideratë zhvillimet e fundit në Gjykatën e Rrethit Gjyqësor Krujë lidhur me arrestimet e kryera nga Struktura e Posaçme Kundër Korrupsionit dhe Krimit të Organizuar (SPAK), garanton opinionin publik se ka marrë të gjitha masat për vijimin e veprimtarisë së gjykatës, për të garantuar aksesin e qytetarëve në drejtësi.

Këshilli i Lartë Gjyqësor rithekson se nuk mund të japë udhëzime nё lidhje me proceset gjyqësore që zhvillohen në gjykatë, procese të cilat duhet të zhvillohen pa asnjë ndikim, të çfarëdolloji. Si organ i qeverisjes së pushtetit gjyqësor në Republikën e Shqipërisë, Këshilli i Lartë Gjyqësor respekton pavarësinë e institucionale dhe të drejtën e qytetarëve për proces të rregullt ligjor.

Këshilli do të marrë në vazhdimësi të gjitha masat e duhura për të garantuar vijueshmërinë e veprimtarisë së gjykatave dhe forcimin e besimit të publikut në sistemin gjyqësor.