Pas Borrellit, Ambasadori rus: Pa Rusinë s’ka marrëveshje Kosovë-Serbi!

Pas deklaratës së shefit të diplomacisë evropiane Josep Borrelli në Beograd se pa Rusinë, Kinën dhe Indinë nuk ka ulëse të Kosovës në OKB, këtë e konfirmon edhe Ambasadori i Rusisë në Beograd, Alexander Botsan Harchenko, ndërsa shtoi se Rusia do të përfshihet në negociatat midis Serbisë dhe Kosovës, nëse merr një ftesë të tillë nga Beogradi.

“Pa Rusinë dhe pa miratim nga Këshilli i Sigurimit i Kombeve të Bashkuara, marrëveshja midis dy vendeve nuk vjen në shprehje,” tha Harchenko për mediat në Beograd, raporton RFE.

Harchenko tha se nuk janë të sakta kritikat se Rusia nuk do zgjidhje dhe se përmes Serbisë dëshiron të ruajë ndikimin në rajon.

“Interes i Rusisë gjithmonë ka qenë vazhdimi, në këtë rast rifillimi i bisedimeve,” tha Harchenko edhe pse në realitet ishte vetëm Rusia që pengoi këto bisedime madje nxiti Serbinë të jetë destruktive.

Dialogu midis Kosovës dhe Serbisë është ndërprerë në fund të vitit 2018 kur Kosova u ka vënë taksë 100 për qind importeve të Serbisë dhe Bosnje e Hercegovinës.

Serbia e ka kushtëzuar rikthimin në dialog me heqjen e taksës, por Kosova, përkundër thirrjeve të komunitetit ndërkombëar, vazhdon ta mbajë në fuqi këtë masë.

Vitin e kaluar, Departamenti amerikan i Shtetit dhe Shtëpia e Bardhë kanë emëruar të dërguarit e tyre të posaçëm në dialogun Kosovë-Serbi.

Ky proces, që ka nisur në vitin 2011, është ndërmjetësuar vazhdimisht nga Bashkimi Evropian, ndërsa ka pasur mbështetjen e SHBA-së.