Pas cerifikimit, Kurti: Qeveria e re do të drejtohet nga unë!
Kryeministri Albin Kurti tha sot se ai do të udhëheq edhe me qeverinë e re, e cila pritet të krijohet pas certifikimit të rezultateve të zgjedhjeve të 9 shkurtit.
“Së pari rezultatet përfundimtare, pastaj certifikimi, pastaj bisedimet. Qeveria, e sigurt, e udhëhequr nga Lëvizja Vetëvendosje dhe unë,” tha Albin Kurti sot pas përfundimit të aktivitetit në shënimin e Ditës Ndërkombëtare të Gruas, ku u bë prezantimi i Rrjetit të Grave në pozita vendimmarrëse në administratë publike dhe institucione te pavarura.
Ndërkohë në një intervistë për mediat italiane, Nënkryetari i Lëvizjes Vetëvendosjes dhe njëherësh kryetari i Kuvendit, Glauk Konjufca, ka thënë se qeverinë synojnë ta formojnë me partitë joserbe, të cilat kanë 10 vende të rezervuara, derisa sivjet një ulëse në kuvend e ka siguruar edhe partia serbe e drejtuar nga ministri aktual në qeverinë Kurti, Nenad Rashiç.
Por, për të arritur shumicën e thjeshtë, kryeministri Kurti ka nevojë edhe për dy deputetë.
Ndërkohë, KQZ duket se ende është larg përmbylljes së procesit dhe certifikimit të rezultateve. Ky organ sot vendosi për rinumërim të votave në 50 vendvotime. Nga ana tjetër, Vetëvendosje ka paralajmëruar se do të paraqesë ankesë në Gjykatën Supreme pasi PZAP e refuzoi kërkesën e këtij subjekti si të pasafatshme për anulim të rezultateve të votave me postë dhe ripërsëritje të tyre. LVV pretendon se ka pasur manipulim të votave me postë nga LDK-ja.
E zëra për rinumërim të plotë të votave ka pasur gjatë fundjavës edhe nga vetë anëtarë të LDK-së, ku përmes Facebookut një kërkesë të tillë e kanë paraqitur Driton Selmanaj, Arben Gashi dhe Hykmete Bajrami.
Ndryshe, partia që e drejton Albin Kurti, Lëvizje Vetëvendosje në zgjedhjet e 9 shkurtit doli e para me 42.27 për qind të votave të fituara, që sipas kalkulimeve paraprake llogaritet me 48 ulëse në legjislaturën e re të Parlamentit. Megjithatë, për ta krijuar qeverinë i duhen 61 deputetë.
