Pas deklaratave për “Kuvendin gjithëserb”, BeH notë proteste Malit të Zi

Ministri i Punëve të Jashtme i Bosnje Hercegovinës, BeH, Elmedin Konakoviq, i dërgoi notë proteste Malit të Zi, për shkak të deklaratave kontroverse të kryetarit të Parlamentit, Andrija Mandiç, se “Kuvendi gjithëserb është një tubim i dy shteteve”.

“Edhe pse jemi mësuar prej tij, edhe pse ai vazhdimisht sillet kështu, ne do të reagojmë gjithmonë ndaj përpjekjeve për të sulmuar rendin kushtetues të Bosnje Hercegovinës,” tha Konakoviç, raporton RFE.

Elmedin Konakoviç tha se do të analizojë nëse do t’i dërgojë notë proteste edhe Serbisë, për shkak të disa interpretimeve të presidentit serb, Aleksandar Vuçiç.

Mosrespektimi që Bosnje Hercegovina ka përjetuar kohëve të fundit nga Vuçiçi, shefi i diplomacisë boshnjake tha se ka kulmuar me atë “Kuvend”.

Sipas tij, deklarata e nënshkruar përmban disa kërcënime serioze për sovranitetin e Bosnje Hercegovinës, përfshirë një numër termash dhe frazash që janë jokushtetuese dhe që dëshmojnë ndërhyrje të rënda në organizimin e brendshëm të Bosnjes.

Më herët, edhe Ambasada e Shteteve të Bashkuara në Bosnje Hercegovinë tha se konkluzionet e miratuara në “Kuvendin gjithëserb” paraqesin sulm ndaj Marrëveshjes së Daytonit, me të cilën u krijuan dy entitete të Bosnjes: Federata e Bosnje Hercegovinës dhe Republika Srpska – dhe institucioneve shtetërore të Bosnje Hercegovinës.

Deklarata ndër të tjera thekson edhe Kosovën si “pjesë e patjetërsueshme e Serbisë”.

Ndryshe, “Kuvendi gjithëserb” u mbajt më 8 qershor në Beograd, me pjesëmarrjen e përfaqësuesve të Qeverisë së Serbisë dhe të entitetit serb, Republika Srpska, raporton RFE

Ky Kuvend u organizua nën sloganin “Një popull, një Kuvend – Serbia dhe Srpska” dhe prodhoi të ashtuquajturën Deklaratë për mbrojtjen e të drejtave kombëtare dhe politike dhe të ardhmes së përbashkët të popullit serb.