Pas deklaratës së Kurtit, BE: Marrëveshja për Asociacionin duhet të zbatohet

BE ka përsëritur sot përmes zëdhënësit Peter Stano, se të gjitha marrëveshjet që janë nënshkruar në dialogun Kosovë-Serbi duhet të zbatohen duke përfshirë edhe Marrëveshjen për Asociacionin e komunave me shumicë serbe.

I pyetur lidhur me deklaratën e kryeministrit Albin Kurti se nuk do të lejojë të formohet Asociacioni, Agjencia serbe e lajmeve Tanjug raporton se Stano është shprehu që BE nuk komenton deklaratat e të tjerëve dhe është e qartë kur bëhet fjalë për zbatimin se çfarë është marrë vesh në dialog.

“Duhet të bëjmë gjithçka që të zbatohet ajo çfarë është nënshkruar,” tha Peter Stano.

Ndryshe, Kryeministri i Kosovës, Albin Kurti, në një intervistë për BBC është shprehur se nuk do të lejojë formimin e Asociacionit të komunave me shumicë serbe qoftë si kryeministër apo në opozitë.