Pas deklaratës së Trump, Kurti: Presion duhet t’i bëhet Beogradit!

Pas deklaratës së Presidentit amerikan Donald Trump se do të riangazhohet në dialogun Kosovë – Serbi, Kryeministri në detyrë Albin Kurti, tha spy se normalizimi i marrëdhëniëve nuk mund të ndodhë pa përmbushjen e obligimeve nga ana e Beogradit.

“Për të normalizuar marrëdhëniet mes dy vendeve tona është e domosdoshme që ata pikë së pari t’ua dorëzojnë autoriteteve të shtetit tonë, Milan Radojçiçin, kryekriminelin që na vrau rreshterin policor, heroin e Kosovës, Afrim Bunjaku. Më pastaj të pranojnë të nënshkruajnë marrëveshjen bazike me aneksin e zbatimit dhe njëkohësisht ta tërheqin letrën nga dhjetori i vitit 2023, kur ish-kryeministrja Brnabiç pati thënë që nuk respekton integritetin territorial të Kosovës,” tha Albin Kurti i bindur se normalizimi është i mundur.

“Trysnia duhet të jetë mbi Beogradin, dhe gjithmonë e mirëpresim rolin e SHBA të cilët paraqesin aleatin tonë kryesor, partnerin e pazëvendësueshëm dhe mikun special në tri fusha kryesore: e para mbrojtja, e dyta është diplomacia dhe e treta është zhvillimi.”

Ndryshe, dje Presidenti Trump përmes rrjetit social Truth Social tha se gjatë mandatit të tij të parë presidencial, Kosova dhe Serbia ishin duke shkuar drejt një përplasje të ashpër dhe ishte gati shpërthimi i një lufte, por ai e ndaloi, ndërsa akuzoi pasardhësin e tij, ish-presidentin Joe Biden, se e ka dëmtuar perspektivën afatgjatë me disa vendime shumë të pakuptimta, që ai u zotua se do ti rregulloj sërish.

Në vitin 2020, në mandatin e parë të Donald Trump si President, Kosova dhe Serbia firmosën në Shtëpinë e Bardhë një marrëveshje për normalizim ekonomik. Kjo Marrëveshje, që përfshiu edhe njohjen e pavarësisë së Kosovës nga Izraeli, nuk është zbatuar plotësisht.