Pas dekretit të Thaçit, LDK i drejtohet Parlamentit, Vetëvendosje Kushtetueses

Pas dekretimit të Avdullah Hotit për krijimin e qeverisë së re nga ana e Presidentit të Kosovës, Hashim Thaçi, LDK ka dorëzuar kërkesën për seancë të jashtëzakonshme me 61 firma. Lajmin e ka bërë të ditur, shefi i Grupit Parlamentar të LDK-së, Arben Gashi, duke folur për një seancë të cilën LDK mendon se do të mbahet të shtunën në orën 13 ndërsa siguroi se Lidhja Demokratike e Kosovës i ka votat e mjaftueshme për të votuar qeverinë e re.

Ndërsa Lëvizja Vetëvendosje i është drejtuar Gjykatës Kushtetuese, lidhur me dekretimin e Avdullah Hotit të LDK-së për krijimin e Qeverisë nga presidenti i Kosovës, Hashim Thaçi.

“Konsiderojmë se Presidenti e ka shkelur Kushtetutën. Ne sot këtu jemi për të dëshmuar së ndaluri Kushtetutën, kushtetshmërinë dhe Republikën e Kosovës”, ka thënë Selimi duke shtuar:

“Presim vendim të drejtë të Gjykatës Kushtetese, por ne do të veprojmë sipas rrjedhave”.

Nga ana tjetër, Nënkryetarja e Parlamentit të Kosovës, Arbërie Nagavci u ka bërë thirrje deputetëve të Parlamentit të Kosovës, që të presin vendimin e Kushtetueses.