Pas denoncimit të PD, Veliaj “hap” themelet e shkollës së re “Sami Frashëri”

Pas denoncimit të Partisë Demokratike se shkolla “Sami Frashëri” vazhdon të jetë në gërmadha përkundër premtimeve të Kryetarit të Bashkisë Tiranë, Erion Veliaj, ky i fundit organizoi në shpejtësi një spektakël duke i dhuruar opinionit “hapjen” e themeleve për ndërtimin e shkollës së re “Sami Frashëri” ndërsa përdori si dekor nxënësit ekselentë të shkollës dhe përfaqësues të bordit të prindërve.

“Nuk ka mënyrë më të mirë se ta nisnim sot punën së bashku me nxënësit më të mirë të “Sami Frashërit”. Themelet në arsim janë themelet më të rëndësishme. Patjetër, njerëzit kanë nevojë për shtëpi, por themelet e shkollave janë “paja” që i lëmë një gjenerate tjetër,” tha Erion Veliaj i shoqëruar nga ministrja e Shëndetësisë, Ogerta Manastirliu, dhe ministri për Rindërtimin, Arben Ahmetaj, në spektaklin e quajtur “inspektim i punimeve” ndërsa shtoi:

“Sot kundërshtari ynë është injoranca, gënjeshtra, janë të pavërtetat, fryma e përçarjes që fusin ca politikanë, për të cilët nuk ka rëndësi nëse ka qenë tek “Samiu” apo jo, dhe thonë: Shkolla do shkojë në Paskuqan, se këtu do bëhet pallat. Ata duhet të turpërohen sot, është momenti të heshtin, të ulin kokën dhe nëse kanë gjak shqiptari, sot është momenti që edhe të skuqen,” Kryetari i Bashkisë Tiranë, Erion Veliaj duke falënderuar prindërit e nxënësve për mirëkuptimin dhe bashkëpunimin, duke i siguruar se “Sami Frashëri” do të ringrihet më e fortë e më e madhe.

Ndryshe, e ndërtuar në vitet ‘60, gjimnazi “Sami Frashëri” zyrtarisht u tha se pësoi dëme të rënda në kollonat mbajtëse nga tërmeti i 26 nëntorit 2019. Godina e re, sipas zyrtarëve që marrin pjesë në promovimin e këtij projekti theksojnë se jo vetëm do t’i japë fund mësimit me dy turne, por do të ketë dhe laboratorë modernë, terrene sportive dhe ambiente në shërbim të komunitetit të zonës pas mësimit.