Pas depozitimit të amendamenteve, Basha: Vettingu i politikanëve le të fillon me mua!

Pas depozitimit të amendamenteve kushtetuese në Parlament, Kryetari i Partisë Demokratike, Lulzim Basha, tha se amendamentet kanë të bëjnë me reformën zgjedhore dhe zhbërjen e ndryshimeve të 30 korrikut që u kaluan pa vullnetin e opozitës, me katastrofën e përditshme, që përjetojnë shqiptarët si dhe me vettingun e politikanëve.

“Për të njoftuar pikë së pari se para disa minutash PD ka depozituar në Kuvend amendamentet kushtetuese në lidhje me tre prioritete absolute për të nxjerrë shqiptarët nga depresioni, kriza, produkt i keqqeverisjes. Ashtu siç ju kam informuar, këto tre çështje kryesore në amendamentet tona kanë të bëjnë me reformën zgjedhore, përfshirë të gjitha aspektet e saj, edhe patronazhistët të cilët i pretë belaja, bashkë me kreun e tyre; për të organizuar përmes zgjedhjeve të lira e të ndershme hapin e parë për daljen e Shqipërisë nga kriza, që është kthimi i Shqipërisë në shina,” tha Lulzim Basha duke shtuar se lënia e pushtetit nuk është dramë.

“Amendamentet kushtetuese kanë të bëjnë me zhbërjen e ndryshimeve të njëanshme të 30 korrikut, të kaluara pa vullnetin e opozitës, dhe depozitimi i kërkesës për komisionin zgjedhor, për të nisur sa më shpejt punën, me qëllim që reforma zgjedhore me të gjithë komponentët e saj të nisë një orë e më parë,

Amendamenti tjetër ka të bëjë me katastrofën e përditshme, që përjetojnë shqiptarët. Në këtë kuadër propozimi ynë është i qartë. Në Kushtetutë ekzistojnë ende komunat, akoma ka një vullnet që e kam prekur në çdo tur, për të pasur pushtetin vendor afër qytetarëve. Të shumtë janë ata që mendojnë se me këtë ndarje kanë asgjësuar çdo shërbim, nuk i përgjigjet kërkesave të qytetarëve.

Kemi paraqitur amendamentin tonë që parashikon bashki urbane dhe rurale, pak rëndësi ka nëse do quhen bashki dhe komuna, rëndësi ka që vendori t’i shërbejë qytetarëve. Propozimi i tretë ka të bëjë me vetingun e politikanëve. Koncepti i 2018 për ta pastruar Kuvendin nga politikanë që lidhen me krimin, është objektiv edhe sot, por ka një ndryshim themelor.

Një nga pyetjet që nuk i jemi përgjigjur dot në 2018, se kush do e bëjë vetingun e politikanëve. Përgjigjja jonë eshtë sot e definuar në propozimin kushtetues, ia kalon këtë detyrë një institucioni të ngritur tashmë, funksionimi i të cilit është ende në provë, dhe kjo është SPAK në tërësinë e saj, nga prokuror”

Çfarë do kontrollohet?

“Siç e kemi thënë prej fillimit, pandëshkueshmëria e politikanëve të lartë është një ndër problemet pse nuk ecet para. Vëmendja kryesore është shkëputja e politikës me krimin. Procesi i kontrollit të deklarimit të pasurive ka qënë në kritikë të vazhdueshme dhe numri e niveli i subjekteve që kanë provuar forcën e ligjit është shumë modest. kemi fakte konkrete që i kemi denoncuar, media i ka publikuar, kemi edhe akuza në të dyja drejtimet. Pra, akuzat e paprovuara shërbejnë për të mbuluar këtë llum korrupsioni ku është zhytur një pjesë e politikës duke vjedhur paratë e pronat publike të shqiptarëve. Ky është momenti që sic thotë populli të ndahet shapi nga sheqeri,” tha Kryetari i PD duke kërkuar nga SPAK që të marr këta politikanë të lartë dhe t’i fusë në sitën e kontrollit rutinë, të kontrollit të familjarëve të tyre apo të tretëve që menaxhojnë pasuri të paligjshme të politikanëve.

Partia Demokratike, tha Basha, do të kërkojë një reformë të thellë kushtetuese, e cila është një domosdoshmëri, sot kur kemi një republikë të rënë dhe demokraci të vrarë më 25 prill.

“Një parlament që nuk është përfaqësues i qytetarëve. Pushteti vendor do të jetë i tyre dhe jo i bajraktarëve. Këto janë ato që sot janë depozituar në kuvendin e Shqipërisë dhe krahas iniciativave tona, siç janë reformat territoriale, zgjedhore dhe komisionet hetimore, do të vazhdojnë krah për krah me betejën tonë për qytetarët, ndaj këtyre problemeve, siç janë ato që pamë në ditën e parë me studentët në universitete. Këto janë prioritetet tona dhe asnjë tjetër,” tha Kryetari i PD duke e konsideruar nevojë imediate ndryshimin e sistemit zgjedhor.

“Së pari sa i përket sistemit zgjedhor, nuk ka asnjë pengesë që komisioni zgjedhor të shqyrtojë sistemin zgjedhor të 2008. Unë personalisht kam folur për nevojën pa rritur kostot. I qëndroj asaj që thash që mandati i kryeministrit duhet të jetë jo më shumë se 8 vite. Besoj se një president nga populli është një opsion që nuk duhet përjashtuar. Unë gjykoj se vendi është në krizë që përkeqësohet dita ditës dhe këtu ka nevojë që të lëvizim paralelisht dhe së dyti duhet t’i nënshtrohet një diskutimi të gjerë me shoqërinë. Të gjithë do të japin mundësinë të shprehin mendimet e tyre. Jo të gjithë kemi të drejtë si e shohim një republikë funksionale, por të gjithë kanë të drejtë të thonë fjalën e tyre para se të merren vendime.”

Dhe, për miratimin e tyre, lideri i opozitës kërkon konsensus politik.

“Për ta bërë këtë Shqipëria disponon instrumente ligjore, si ligji antimafia, ajo që kërkohet është vullneti politik. Edhe nëse masakra e 25 prillit s’do kishte ndodhur dhe PD do ishte në qeverisje të vendit, nuk kam dyshim se do nuk do i kishim votat për ta miratuar. Ndryshime të tilla kushtetuese duhet patjetër të kenë konsensus. Është interes i shqiptarëve, që politika të pastrohet nga llumi i tranzicionit. Kanë futur në politikë, llumin e shoqërisë krimin e organizuar, kanë shkatërruar konkurencën në kurriz të sipërmarrësve të ndershëm.

Pra, kush e sheh si një ekspeditë ndëshkimore ndaj krimit të organizuar e ka gabim. Meritojnë ekspeditë ndëshkimore, por ne jemi opozita e vendit, kemi detyrimin moral e politik që këtë që vlon nga kafet e qendrës së Tiranës deri në Konispol ta përkthejm në vullnet politik për të ndryshuar. Ndaj palës tjetër i lind detyrimi të dalin haptas para shqiptarëve. Duke pranuar këto ndryshime i mbyllin derën tranzicionit. Çdo alibi nxjerr zbuluar qëllimin e llumit të tranzicionit për ta mbajtur Shqipërinë peng. Ne refuzojmë të jemi pjesë e asaj pjese politike.

Ndryshimi ka qenë kryefjale e fushatës tonë, tha Basha, dhe s’ka masakër, sipas tij, që i heq nga ndryshimi:

“Do të bëhet me çdo kosto. Çdo politikan që nuk justifikon dot pasurinë e vet, të familjes apo ortakëve duhet të largohet nga politika dhe ky mekanizëm i largon nga politika. Ky është një zotim i yni, një interes kombëtar. Nuk ka socialist të ndershëm mos më japë të drejtë, kur numëron kacidhet në fund të muajit. Për të mos folur për demokratët me këtë qeveri, po edhe në raport me llumin e qeverisë tonë. Edhe në kemi patur llumin tonë. Llumi i tranzionit janë njerëz që abuzojnë nga besimi i partisë së tyre, dhe janë këto abuzime të pandëshkuara që na kanë sjellë në këtë pikë,” tha Kryetari i PD duke e pranuar që vettingu i politikanëve të nisë nga vetë ai, jo si një sfidë, por si e vetmja mënyrë për të ndarë baltën nga e vërteta.

“Kush e shikon me syzet e politikës së përditshme bën gabim. Bën një gabim klasik, në raport me mua. Për mirë apo keq, jam përpjekur të shoh përtej të përditshmes, iu heq shpresën e vizionin për të parë cfarë mund të jemi ne. Të shohësh përtej, duhet të mendosh përtej. Nëse rri si miu në cark me bishtin ndër dhëmëb, sillesh vërdallë e nuk sjell zgjidhje. Jo rrallë e kemi paguar me kosto jo të vogël. Si çdo propozim tjetër interesat tona janë interesat e shqiptarëve. I pari dhe kryesori është ndarja e politikës me krimin dhe largimi i politikanëve të korruptuar. për këtë s ka pse ti hedhim sytë te vendet e tjera. Ky është vendi i shqiptarëve, nuk është as i Ramës, Berishës, Metës, as i imi. Të gjithë shqiptarët kanë një interes për ta parë që vendi të eci para, ndaj duhet që praktikat e dështuara të 30 viteve tranzicion të marrin fund. Me fjalë? Jo, me vepra. Politikanët e lidhur me krimin,” thekson Kryetari i PD, Lulzim Basha, duke përfunduar:

“Nise me mua, nëse ke frikë ta nisësh me Kryeministrin. Nuk është sfidë, po është e vetmja mënyrë për të ndarë baltën nga e vërteta. Nis kontrollin e pasurive, merr vendimet e duhura, largo politikanët e korruptuar, ose ata që s’iu mbajnë këllqet jepi mundësinë të largohen nga politika para se të miratohet ky ligj.”