Pas “Europa Nostra”, Basha: Grabitja e Teatrit Kombëtar, akt lufte!
Duke reaguar pas deklaratës së Organizatës Europiane për Mbrojtjen e Trashëgimisë Kulturore Europiane, “Europa Nostra”, në mbështetje të Teatrit Kombëtar, Kryetari i Partisë Demokratike, Lulzim Basha, thekson se afera me Teatrin, është vjedhja më e dhunshme që u bëhet shqiptarëve nga Edi Rama.
“Afera me TK është vjedhja më e dhunshme që u bëhet shqiptarëve nga Rama. Grabitja e TK në mes të pandemisë është akt lufte ndaj shoqërisë dhe ekonomisë që po rrënohen nga RAMAVIRUSI: varfëri masive, krizë e thellë, papunësi e lartë, institucione të kapura dhe korrupsion rekord,” shprehet Lulzim Basha në reagimin e tij përmes rrjetit social Twitter, pasi kaloi natën me artistët dhe aktivistët në oborrin e Teatrit Kombëtar duke shprehur solidaritetin për këtë kauzë.
Kjo deklaratë vjen disa orë pasi Organizata Europiane për Mbrojtjen e Trashëgimisë Kulturore Europiane, “Europa Nostra” e shpalli Teatrin Kombëtar si një nga 7 ndërtesat më të rrezikuara në Europë, që duhet mbrojtur dhe restauruar.
Ndryshe, “Europa Nostra” në deklaratën e saj sqaron pse kundërshton propozimin për prishjen e paligjshme të Teatrit Kombëtar në Tiranë:
“Ne jemi për trashëgiminë kulturore të Europës. Prandaj, edhe kundërshtojmë propozimin për prishjen e paligjshme të Teatrit Kombëtar në Tiranë, një nga 7 sitet kulturore më të rrezikuara në Europë. Teatri është i mbrojtur nga legjislacioni vendas, si dhe shoqëria civile e ekspertët.”
Për këtë qëndrim, “Europa Nostra” ka vënë në dijeni disa institucione dhe personalitete europiane, prej të cilëve kërkohet reagim si, Presidentin e Parlamentit Europian, David Sassoli, Komisioneren europiane për Kulturë, Maryia Gabriell, Përfaqësuesin e Lartë të Bashkimit Europian për Politikën e Jashtme, Josep Borell, Ambasadorin e BE në Shqipëri, Luigi Soreca. Gjithashtu, për këtë qëndrim “Europa Nostra” ka vënë në dijeni edhe kryeministrin Edi Rama dhe kryebashkiakun e Tiranës Erion Veliaj, si dhe Aleancën për Teatrin, që është në mbrojtje të Teatrit Kombëtar.
