Pas fitores në New Hampshire, Biden: Tani është e qartë, Donald Trump kandidat i republikanëve
Donald Trump fitoi në zgjedhjet për kandidat presidencial të republikanëve në New Hampshire, duke ngadhnjyer për herë të tretë në garën për nominim presidencial në Partinë Republikane. Pas numërimit të 90 për qind të votave, fitorja e tij konfirmohet ndaj rivales Nikki Haley, në shtetin ku ajo ishte shumë e favorizuar, dhe ndonëse është vetëm fundi i garës në shtetin e dytë, gjithçka është e qartë.
Associated Press dhe rrjetet tjera televizive e kanë shpallur fitoren e Ish-Presidentit Donald Trump pak kohë pasi u mbyllën qendrat e votimit, bazuar në rezultatet e sondazheve.
Donald Trump vazhdon ta mbajë përparësinë e tij me 12 për qind të votave ndërsa janë numëruar 89 për qind e votave, me 55 për qind të votave sa ka aktualisht Trump ndaj Nikki Haley e cila ka 43 për qind të votave.
Tani është vetëm çështje koha se kur Nikki Haley do të tërhiqet nga gara duke i dorëzuar kurorën republikane Donald Trumpit. Haley në fjalën e saj në New Hampshire pasi u shpallën rezultatet e sondazheve tha se do ta vazhdoj garën duke e përshkruar veten si “luftëtare”.
E qartë është se fjalimi i saj i fundit në New Hampshire ishte i projektuar për mesazhin se ajo nuk heq dorë, thekson BBC në analizën për garën parazgjedhore në New Hampshire, por pritet që pas dyerve të mbyllura donatorët e saj do të vendosin nëse ja vlen të vazhdohet me këtë fushatë.
Gjithë këto hamendësime vijnë pasi Ish-Ambasadorja e Shteteve të Bashkuara në OKB, Nikki Haley, kishte dhe mbështetjen e guvernatorit të shtetit Chris Sunun, i cili u angazhua seriozisht në fushatë, dhe asgjë nuk e ndihmoi Haley.
Biden: Tani është e qartë, Trump do jetë kandidat republikan
Presidenti i Shteteve të Bashkuara, Joe Biden, tha se tani është e qartë që Donald Trump do të jetë kandidat republikan për zgjedhjet e vitit 2024.
“Tani është e qartë se Donald Trump do jetë kandidat republikan. E mesazhi im për SHBA është se basti nuk mund të jetë më i madh. Demokracia jonë. Liritë personale, nga e drejta për të zgjedhur deri te e drejta e votës. Ekonomia jonë, e cila ka arritë rimëkëmbjen më të madhe nga COVID-19 në botë. Gjithçka është në rrezik,” tha Biden përmes një komunikate duke i bërë thirrje kandidatëve republikanë dhe atyre të pavarur, që ndajnë angazhimin për vlerat themelore të kombit – demokracinë, lirisë personale dhe ekonomisë që i japin të gjithë shanse të ndershme, që ti bashkohen.
