Pas humbjes në zgjedhjet parlamentare, largohet lideri i konservatorëve gjerman

Pas humbjes katastrofike në zgjedhjet parlamentare, ku ishte kandidat për kancelar, sot lideri i konservatorëve gjerman, Armin Laschet, paralajmëroi largimin nga kreu i CDU-s. 

“Shumë shpejtë do të merremi me ekipin e ri të CDU-s,” tha ai në Berlin ku vazhdon të jetë nën presion të madh pas zgjedhjeve të 26 shtatorit.

Pa u bërë ende gjashtë muaj pasi mori drejtimin e partisë nga Angela Merkel, Laschet tha se do të kërkoj mbajtjen e Kongresit të CDU ku do të vendoset e ardhmja dhe riorganizimi i udhëheqjes.

“Nga tërheqja e Angela Merkel nga kryesimi, jemi duke zhvilluar një debat të pandërprerë mbi drejtimin e partisë,” tha Laschet.

E përditshmja gjermane Bild, raporton se sot është vendosur që Kongresi i CDU të zhvillohet në muajin dhjetor në Dresden.

Votuesit e konsiderojnë përgjegjës

Për rezultatin më të keq zgjedhor që kanë arritur konservatorët në historinë e Gjermanisë moderne, votuesit e konsiderojnë personin më përgjegjës, Armin Laschet.

Ndryshe, në zgjedhjet parlamentare të parët u renditën socialdemokratët e SPD me 25.8 për qind, pasuar nga Unioni CDU/CSU me 24.1 për qind, të tretët janë Të Gjelbërit me 14.8 dhe liberalët e FDP me 11.5 për qind.

Sot kanë filluar negociatat për koalicionin qeverisës në mes të SPD, Të Gjelbërve dhe liberalëve të SPD, me kandiatin e socialdemokratëve për kancelar, Olaf Scholz.

Ndërkohë sondazhet tregojnë se kandidati për kancelar i një partie që nuk ka fituar zgjedhjet, Armin Laschet, nuk mund të marrë kryesimin e negociatave për krijimin e qeverisë.