Pas Jubileut, Papa Leoni XIV rifillon udhëtimet e tij: Afrikë, Spanjë dhe Monaco

Sot u bënë të ditur Udhëtimet apostolike të Papa Leonit XIV: Dhjetë ditë në Afrikë, duke përfshirë Algjerinë, Kamerunin, Angolën dhe Guinenë Ekuatoriale, një ditë në Monte Carlo dhe gjashtë ditë në Spanjë, duke përfshirë Madridin, Barcelonën dhe arkipelagun e Kanarieve.

Një udhëtim dhjetëditor në Afrikë dhe dy udhëtime në Evropë, një për një ditë të vetme në Principatën e Monacos dhe një për gjashtë ditë në Spanjë dhe arkipelagun spanjoll të Kanarieve. Pas udhëtimit të tij të rëndësishëm apostolik në Turqi dhe Liban në fund të vitit 2025 dhe njoftimit të udhëtimeve të ardhshme në Itali, të cilat do ta çojnë Atin e Shenjtë në Lampeduzë, Papa Leoni rifillon shtegtimet e tij nëpër botë, siç u njoftua sot nga Zyra e Shtypit e Selisë së Shenjtë.

Më i gjati – nga data 13 deri më 23 prill – do ta çojë Leonin XIV në gjurmët e Shën Aigustinit në Algjeri – Algjer dhe Anaba; pastaj në Afrikën Qendrore, Kamerun – Yaoundé, Bamenda dhe Douala; Angolë – Luanda, Muxima dhe Saurimo; dhe, në fund në Guinenë Ekuatoriale – Malabo, Mongomo dhe Bata.

Një udhëtim kompleks, i cili njëkohësisht është edhe një udhëtim në kujtim të shenjtit të Hipponës, Augustinit, me të cilin është i lidhur Pasardhësi i Pjetrit, përpara se të vizitojë dy vende në zhvillim, me një fokus të veçantë tek më të prekshmit, të varfrit e shoqërisë dhe ata që kujdesen për ta.

Paqja do të jetë gjithashtu një nga objektivat: Leoni XIV do të udhëtojë në rajonin anglofon të Kamerunit verior, ku një luftë civile ka shpërthyer prej dhjetë vjetësh, duke përfshirë forcat e armatosura të rregullta dhe separatistët.

Ndalesa e fundit është Guinea Ekuatoriale, i vetmi vend spanjishtfolës në Afrikë.

Ky shtegtim i Leonit XIV, për sa i përket kohëzgjatjes, është i ngjashëm me atë të ndërmarrë në Afrikë nga Shën Gjon Pali II në vitin 1985, me shtatë vende të vizituara në 11 ditë.

Udhëtimet ndërkombëtare të gjysmës së parë të vitit 2026 do të fillojnë me një udhëtim njëditor evropian në Principatën e Monacos, të planifikuar për 28 mars, në prag të Javës së Shenjtë të Pashkëve. Leoni deshi t’u përgjigjej pozitivisht ftesave të përsëritura drejtuar nga autoritetet monegaske, së pari Papa Françeskut dhe më pas edhe atij.

Principata Monacos përfaqëson një realitet evropian ku katolicizmi është fe shtetërore dhe ku dialogu midis institucioneve civile dhe Kishës ruan një rëndësi konkrete, madje edhe në debatin publik. Angazhimi i Principatës së Monacos për paqen është gjithashtu i rëndësishëm, pasi do të mirëpresë një Papë për herë të parë në kohët moderne.

Në fund, nga 6 deri më 12 qershor, Leoni XIV do të vizitojë Spanjën: kryeqytetin Madrid dhe më pas Barcelonën, për të inauguruar kullën e re dhe më të lartë të Sagrada Familia, Bazilikës monumentale që ka riformësuar horizontin e qytetit katalanas.

Vizita e Papës bie në njëqindvjetorin e vdekjes së arkitektit të shkëlqyer që “ëndërroi” Bazilikën dhe filloi ndërtimin e saj, Antoni Gaudí, i shpallur Shërbëtor i Nderuar i Zotit vitin e kaluar.

Papa, duke mbetur në Spanjë, do të udhëtojë nga Barcelona në Ishujt Kanarie, për të përfunduar një udhëtim që ishte në zemër të Papës Françeskut, siç theksoi Kardinali Kryeipeshkëv i Madridit José Cobo Cano janarin e kaluar. Do të ketë dy ndalesa për Leonin XIV, Tenerife dhe Gran Canaria.

Përmes këtyre tre udhëtimeve ndërkombëtare apostolike, Papa Leoni XIV do të ketë mundësinë të takojë një larmi të gjerë vendesh dhe situatash, nga një komb mysliman si Algjeria, ku të krishterët janë një pakicë e vogël dhe një farë vëllazërie, deri te vendet me shumicë të krishterë të vendosura në zemër të kontinentit afrikan, me sfidat dhe dëshminë e tyre të gëzueshme të besimit.

Ati i Shenjtë do të bëjë një vizitë të shkurtër në vendin e dytë më të vogël në botë, pas Qytetit të Vatikanit, Principata Monacos, vendosur në Rivierën Franceze, dhe më pas do të udhëtojë në një komb të madh evropian, Spanjën, identiteti i të cilit është formuar nga besimi i krishterë, por është prekur nga shekullarizimi.

Papa do ta përfundojë udhëtimin e tij në Ishujt Kanarie, një nga rrugët kryesore të migrimit nga Afrika në Evropë, ku me dhjetëra mijëra mbërritje çdo vit./vaticannews/