Pas KAS, Celibashi regjistron koalicionin “Bashkë fitojmë” dhe Partinë e Kryetarit nënkryetar

Pas vendimit të Komisionit të Ankimimeve dhe Sanksioneve, KAS, dhe urdhërit për ta regjistruar partinë e Kryetarit nënkryetar, Komisioneri Shtetëror i Zgjedhjeve, Ilirian Celibashi regjistroi koalicionin “Bashkë fitojmë” pa siglën e PD me kryetar Sali Berishën.

Celibashi u shpreh se PD-ja nuk ka shprehur vullnet për t’u bërë pjesë e këtij koalicioni dhe si e tillë, sigla PD e Berishës nuk mund të jetë pjesë e koalicionit “Bashkë fitojmë”.

Në këtë mënyrë ky koalicion do të jetë i përbërë vetëm nga tre parti, PL, PBDNJ dhe PDK.

Ndërkohë me urdhërin e Taulant Ballës dhe me bekimin e Edi Ramës, KQZ bazuar në vendimin e KAS ka vendosur sot të regjistrojë PD-në e Kryetarit nënkryetar për zgjedhjet e 14 majit.

Gjatë mbledhjes, përfaqësuesi i Partisë Lirissë, Altin Kaziaj i kërkoi Ilirian Celibashit të shtynte vendimin derisa çështja të shqyrtohet në Kolegjin Zgjedhor, por ai refuzoi këtë kërkesë.

“Ky vendim i KAS ngelet thjesht dhe vetëm teknikisht për tu zbatuar nga komisioneri Shtetëror. Është akti i një organi të parashikuar nga ligji për të vendosur për çështje të tilla. Për sa kohë ky organ ka vendosur regjistrimin si subjekt zgjedhor të PD-së, ngelet vetëm zbatimi i këtij vendimi,” tha Komisioneri Shtetëror i Zgjedhjeve, Ilirian Celibashi, duke vendosur:

“Vendos regjistrimin e PD-së me nënkryetar Enkelejd Alibeaj, në cilësinë e kryetarit të komanduar të PD-së për zgjedhjet e 14 majit.”