Pas kërcënimeve të Edi Ramës, KLP: Respektoni pavarësinë dhe integritetin profesional të prokurorëve

Pas kërcënimeve të bëra nga Kryeministri Edi Rama ndaj të gjithë atyre që kontribuan për prangosjen e Kryetarit të Bashkisë, Erion Veliaj, dhe reagimit të Këshillit të Lartë Gjyqësor, KLGJ, ka reaguar dhe Këshilli i Lartë i Prokurorisë, KLP, duke kërkuar nga të gjithë protagonistët që të respektojnë pavarësinë dhe integritetin profesional të prokurorëve.

“Këshilli i Lartë i Prokurorisë kërkon nga të gjithë aktorët që të respektojnë pavarësinë dhe integritetin profesional të prokurorëve, duke siguruar që ata të ushtrojnë funksionet e tyre pa ndikime të jashtme në funksion të dhënies së drejtësisë,” thekson Këshilli i Lartë i Prokurorisë duke rikujtuar se pavarësia e prokurorisë është një gur themeli për besimin e qytetarëve tek institucionet e drejtësisë dhe për garantimin e një sistemi ligjor të drejtë e transparent.

Deklaratë:

Në vijim të qëndrimeve të mëparshme për garantimin e pavarësisë së prokurorëve, Këshilli i Lartë i Prokurorisë rithekson mbështetjen ndaj institucionit të prokurorisë për ushtruar funksionet e tij në mënyrë të pavarur, të paanshme dhe në përputhje me ligjin. Ruajtja e këtyre parimeve është thelbësore për funksionimin e drejtësisë dhe forcimin e shtetit të së drejtës.

Këshilli kërkon nga të gjithë aktorët që të respektojnë pavarësinë dhe integritetin profesional të prokurorëve, duke siguruar që ata të ushtrojnë funksionet e tyre pa ndikime të jashtme në funksion të dhënies së drejtësisë. Pavarësia e prokurorisë është një gur themeli për besimin e qytetarëve tek institucionet e drejtësisë dhe për garantimin e një sistemi ligjor të drejtë e transparent.