Pas kërcënimit të Presidentit Trump, bien tregjet e aksioneve në Kinë
Tregjet e aksioneve në Kinë kanë shënuar sot rënie pasi Presidenti i SHBA, Donald Trump ka kërcënuar me vënie të tarifave të reja kundër këtij shteti, duke vënë në pikëpyetje arritjen e ndonjë marrëveshjeje tregtare, raporton RFE.
Përmes një postimi në Twitter, Presidenti Trump tha se Shtetet e Bashkuara do të dyfishojnë tarifat në mallrat kineze në vlerë të 200 miliardë dollarëve, si dhe do të shtojë tarifa shtesë.
Para deklaratave të Presidentit Trump, ishte menduar se të dyja palët kanë qenë afër miratimit të një dokumenti.
Një delegacion kinez ishte planifikuar të udhëtonte në Uashington këtë javë, me qëllim të dhënies fund të luftës tregtare.
Mirëpo mediat amerikane janë duke raportuar tani se Kina është duke konsideruar anulimin e këtyre takimeve.
Ndërkohë, Qeveria kineze ende nuk ka komentuar zyrtarisht postimet e Presidenti Trumpit në Twitter.
Drejtori për Azinë në Grupin Euroazia, Michael Hirson, tha se “deklaratat e Trumpit kanë injektuar më shumë paqartësi në negociata, dhe rrezikojnë të zgjasin këtë periudhë, ndoshta deri në zgjedhjet e ardhshme presidenciale në SHBA”.
Presidenti Trump e pat arsyetuar vënien e tarifave në mallrat kineze, duke përmendur ato që i ka cilësuar si “praktika të padrejta tregtare” të Kinës ndaj SHBA-së.
