Pas kërkesës së PD, Sekretariati i Etikës anulon votimin e 7 marsit në Parlament

Sekretariati i Etikës ka anuluar votimin e ligjeve më 7 mars në Parlament. Ky vendim vjen pas kërkesës së Grupit Parlamentar të Partisë Demokratike, për të shpallur të pavlefshme votimet e kryera në atë seancë plenare.

Grupi Parlamentar i PD pretendoi se të gjitha ligjet e votuara në seancën e 7 marsit duhet të shpalleshin të pavlefshme, për shkak se nuk ishte plotësuar kuorumi i nevojshëm.

Më 7 mars ligjet kanë kaluar pa pasur korumin e nevojshëm, tha Kryetari i Grupit Parlamentar të PD, Gazment Bardhi, duke saktësuar se në seancë votuan vetëm 68 deputetë kur 71 duhet të ishin së paku.

Pesë projektligjet pritet që të kalojnë për votim në seancën plenare të radhës dhe nuk do të ketë diskutim, sepse konsiderohet se është ezauruar pjesa e diskutimeve për nismat përkatëse.