Pas Këshillit Sigurisë Kombëtare, Gjuriç: Serbët në Kosovë do të dëgjojnë apelin e Vuçiçit!

Pas mbledhjes së Këshillit për Siguri Kombëtare të Serbisë, ku u diskutua situata në Kosovë, Drejtori i zyrës për Kosovën pranë Qeverisë së Serbisë, Marko Gjuriç tha se autoritetet përgjegjëse, ushtria, policia dhe shërbimet e inteligjencës i kanë marrë detyrat që lidhen me parandalimin e operacioneve të agjencive ndërsa shprehu bindjes se serbët në Kosovë do të dëgjojnë apelin e Vuçiçit, raporton RFE.

Sot është afati i fundit për draftimin e statutit të Asociacionit të komunave me shumicë serbe në Kosovë dhe kryeministri i Kosovës, Ramush Haradinaj, kërkoi rritjen e gatishmërisë së institucioneve, në rast të, siç tha ai, çfarëdo prishjeje të rendit dhe ligjit.

“Këto gënjeshtra për skenarë të dhunshëm janë pjesë e një plani të organizuar dhe sistematik të agjencive të shteteve të huaja, që kanë pasur për qëllim që t’ia lidhin duart Serbisë dhe ta parandalojnë atë që të luftojë për përmbushjen e angazhimeve që kanë marrë përsipër Prishtina dhe komuniteti ndërkombëtar në Bruksel”, tha Gjuriç duke shtuar se në funksion të këtyre “veprimeve të agjencive” kanë qenë edhe disa përfaqësues politikë, në mesin e tyre, sipas tij, edhe udhëheqësi i Lëvizjes opozitare për Qytetarë të Lirë në Serbi, Sasha Jankoviç.

Gjuriç tha se është turp i madh që sot në Serbi duhet të flitet për sigurinë e serbëve në Kosovë dhe jo për zbatimin e marrëveshjes për Asociacionin e komunave me shumicë serbe nga ana e Prishtinës dhe për shkeljen e garancive të dhëna nga faktori ndërkombëtar.

Ndërkohë ai i cili tensionoi gjithë situatë me deklaratat e tij të papërgjeshme për dy ditë, Presidenti i Kosovës, Hashim Thaçi, përmes një komunikate sot tha se Kosova është e përkushtuar për arritjen e një marrëveshjeje historike ligjërisht të detyrueshme, në kuadër të fazës së fundit të dialogut për normalizimin e marrëdhënieve mes Kosovës dhe Serbisë.

“Republika e Kosovës do t’i përmbahet në përpikëri zotimeve për ruajtjen e qetësisë dhe mosrrezikimin në asnjë mënyrë të objektivave për normalizimin e plotë të marrëdhënieve mes dy vendeve. Pas krijimit të Ekipit Menaxhues, institucionet e Kosovës janë të përkushtuara që të finalizojnë punën në hartimin e draft-statutit të Asociacionit të Komunave me shumicë serbe në Kosovë, bazuar në marrëveshjet e arritura më 2013 dhe 2015 në Bruksel, ndërmjet Kosovës dhe Serbisë, duke u bazuar në vendimin e Gjykatës Kushtetuese të Republikës së Kosovës”, thekson Presidenti Thaçi duke u bërë thirrje të gjithë qytetarëve, institucioneve dhe palëve të përfshira në këtë proces, që të përmbahen nga çdolloj provokimi dhe të ruajnë qetësinë në një kohë shumë të rëndësishme për vendin tonë.

Në orët e mëngjesit mediat lokale në Serbi kanë raportuar se forcat e KFOR-it, kanë marrë nën kontroll liqenin e Ujmanit, por zyrtaret e KFOR-it i kanë hedhur poshtë këto pohime. Ata theksuan për RFE se prania e trupave atje është pjesë e një ushtrimi të planifikuar më herët.

“KFOR nuk ka marrë nën kontroll asgjë. KFOR-i ka mbajtur një ushtrim të planifikuar që dy ditë. Ne kemi bërë një ushtrim të planifikuar në të gjithë Kosovën dhe jo vetëm në veri. Kjo është bërë për t’i testuar kapacitetet dhe gatishmërinë e ushtarëve të KFOR-it.”

Ndryshe, Liqeni artificial i Ujmanit në veri të Kosovës, është më i madhi në vend dhe aktualisht menaxhohet nga serbët.