Pas Këshillit të Sigurisë Kombëtare, Vuçiç: Serbia nuk e njeh vendimin kundër Milorad Dodikut!
Pas seancës së Këshillit të Sigurisë Kombëtare, Presidenti i Serbisë, Aleksandar Vuçiç, iu drejtua qytetarëve dhe ndryshe nga dje kur tha se shteti serb është në situatën më të vështirë që nga viti 2008 sot u kthye në identitetin e tij kriminel.
Bëri sikur po lexonte vendimet e Këshillit, që sipas tij kishin dy pika të rendit të ditës: situatën në BeH dhe në Kosovë. Në seancën e Këshillit, u mor vendimi që Serbia nuk e njeh vendimin kundër Milorad Dodik dhe se ky vendim është i detyrueshëm për të gjitha organet e Republikës së Serbisë.
“Vendimi ishte përgatitur politikisht, partitë në Sarajevë kërcënuan me demonstrata nëse nuk do të miratohej vendimi i duhur,” tha Vuçiç duke rrëfyer se kishte fol me dy liderë botërorë se si duhet të sillet Serbia dhe se u tha atyre se Serbia është një shtet sovran, por, nuk tha se për cilët liderë është fjala.
Në përfundim, ai tha se Këshilli i Sigurisë Kombëtare vendosi që Serbia ta dënojë fuqishëm vendimin kundër Presidentit të Republikës Srpska dhe ta vlerësojë atë si politik dhe jodemokratik, ndone kemi të bëjmë me një politikan kriminel që nuk njeh as ligjet e Bosnje Hercegovinës dhe ato ndërkombëtare.
Dhe jo vetëm kaq! Serbia nuk e njeh vendimin kundër Milorad Dodik dhe Këshilli vlerësoi se situata e sigurisë në rajon është e kërcënuar nga ky vendim, tha Vuçiç, duke vlerësuar se vendimi që i ndalon Dodikut të angazhohet në politikë për gjashtë vjet, anuloi vullnetin e qytetarëve të Republikës Srpska që zgjodhën Dodikun si përfaqësues legjitim.
Serbia nuk do ta arrestojë Dodikun
Dhe siç akuzoi në fillim të viteve ’90-të shtetet perëndimore dhe kërcënonte që për çdo serb të vrarë do të vras 100 boshnjakë, edhe sot akuzoi agjencitë e huaja të shteteve të caktuara që mbështetën këtë vendim.
“Plani i tyre është që ky vendim të harrohet për një periudhë të caktuar kohore, dhe pastaj të tërhiqet Schmidt dhe të thuhet se gjithçka është në rregull tani që Dodiku është zhdukur.”
Në fund, kur u pyet nga një gazetar nëse Serbia do ta arrestonte Dodikun nëse ai do të ishte në territorin e Serbisë, ai u përgjigj se nuk do ta bënte.
“Nëse lëshohet një urdhër arresti për Milorad Dodikun ndërsa ai është në Serbi, Serbia nuk do ta arrestojë atë. Të gjitha organet shtetërore janë të detyruara të respektojnë vendimin e Këshillit, dhe ai është gjithmonë i mirëpritur këtu,” tha Aleksandar Vuçiç duke konfirmuar edhe një herë se Serbia ishte dhe është strehë e kriminelëve serbë të luftës.
Ndryshe, Gjykata e Apelit në Bosnje Hercegovinë ka konfirmuar aktgjykimin e shkallës së parë të 26 shkurtit, me të cilin Milorad Dodik është dënuar me një vit burgim dhe ndalim prej gjashtë vjetësh të ushtrimit të funksioneve politike.
