Pas Këshillit të Sigurisë, Kurti: Rrëmbimi, hakmarrje ndaj policisë që po lufton krimin!
Pas mbledhjes së Këshillit të Sigurisë, Kryeministri i Kosovës, Albin Kurti, tha se veprimi i djeshëm i Serbisë ishte veprim agresor dhe nuk është befasi, por Kurti e pranoi se është i befasuar me tolerancën dhe heshtjen e ndërkombëtarëve përballë veprimeve të shtetit serb, një ditë pasi u rrëmbyen tre policë kufitarë në veri.
“Rasti i ndjeshëm ishte agresion ndaj shtetit tonë demokratik, hakmarrje ndaj policisë që po lufton krimin, dhe intencë për eskalim dhe destabilizim ku ne tashmë kemi propozuar planin pesë pikësh për de-eskalim dhe normalizim,” tha kryeministri Albin Kurti në daljen e tij publike me ministrin e Brendshëm, Xhelal Sveçla, duke i bërë thirrje ndërkombëtarë që të bëjnë presion mbi Beogradin.
“I bëjmë thirrje ndërkombëtarëve të bëjnë trysni mbi Beogradin dhe bëjmë thirrje për lirimin e policëve. Serbia nuk është që po na befason, nuk ka ndryshuar nga apetitet e saj. Ajo që po na befason është toleranca dhe heshtja e ndërkombëtarëve ndaj veprimeve të Serbisë, e cila vazhdimisht po kërkon destabilizim,” tha sot Kryeministri Albin Kurti pas mbledhjes së Këshillit të Sigurisë duke e pranuar se kjo mbledhje u mbajtë vetëm me informacionet që kishin institucionet kosovare pasi KFOR-i ende nuk ka dhënë kurrfarë informacione ndërsa publikoi një hartë, sipas tij, e vendit ku u rrëmbyen tre policët dhe janë brenda territorit të Kosovës.
Ndryshe, dje brenda territorit të Kosovës u rrëmbyen tre policë nga ana e policëve serbë dhe deri në këto momente, ndërkombëtarët duke përfshirë ambasadorët e Quintit në Kosovë, nuk kanë bërë asnnjë reagim për rastin por vazhdojnë të kërkojnë nga Albin Kurti të ndërmarr hapa konkretë për shtensionimin e situatës në veri.
