Pas Komisionit Ligjeve, Yuri Kim: Ata që nënshkruan 5 Qershorin mos të devijojnë!

Ata që nënshkruan 5 qershorin mos të devijojnë! Është çështje nderi, tha Ambasadorja e SHBA në Tiranë, Yuri Kim, me përfundimin e Komisionit të Ligjeve ku Bashkëkryetari i Komisionit të Posaçëm Parlamentar për Reformën Zgjedhore, Damian Gjiknuri, i mbajti një leksion elektoral socialistëve dhe llumit opozitar se si do të hapen listat dhe si do të funksionojnë koalicionet.

“Në qershor Parlamenti miratoi një ligj që nuk është perferkt por do të shpjerë në drejtimin e duhur.  Jam shumë e kënaqur që opozita jashtë parlamentit ka marrë përgjegjësitë e saj për të përfaqësuar popullin. E kam thënë edhe para disa ditësh që opozita të jetë e angazhuar dhe të gjitha palët të sjellë propozime që janë reale,” Yuri Kim ndërsa për Draftin që dorëzoi Opozita e Bashkuar në Këshillin Politik shtoi:

“Kam kuptuar që sot opozita ka bërë një propozim dhe jam e lumtur që PS ka thënë se do ta marrë këtë kundërpropozim dhe do të ketë një debat real për ta përfshirë. Kjo është ajo që duhet të presim nga një vend që është anëtar i NATO-s, kandidon për në BE dhe kryeson OSBE-në.”

Edhe sot kryediplomatja amerikane në Shqipëri foli qartë për Marrëveshjen e 5 Qershorit dhe mundësitë e ndryshimeve të saj:

“Unë kam folur shumë qartë. 5 qershori është arritur në një mënyrë gjithëpërfshirëse dhe transparente. Çdo palë që ka nënshkruar duhet t’i qëndrojë asaj sepse është çështje nderi. Firma ime nuk ndodhet mbi atë letër. Ata që kanë nënshkruar atë letër janë persona përgjegjës për të zbatuar 5 qershorin. Kështu që pritja ime është që 5 qershori do të nderohet. Nëse palët bien dakord për çështje të tjera përtej 5 qershorit ne do ta mbështesim”.

Ndryshe, Ambasadorja e SHBA në Tiranë, Yuri Kim, këtë mesazh e dha nga Himara ku ishte në drekë pune me Kryetarin e Bashkisë, vizitoi dhe zyrën e Kadastrës ndërsa u shprehë qartë se një nga prioritet e mëdha të Shteteve të Bashkuara është rritja e investimeve amerikane në Shqipëri.