Pas Kosnett/ Haradinaj: Koalicioni mund të prishet, Thaçi: Marrëdhëniet me SHBA nuk prishen

Pas takimit në mes tre krerëve institucionalë, presidentit Hashim Thaçi, kryeministrit Ramush Haradinaj dhe kryeparlamentarit Kadri Veseli me ambasadorin amerikan Philip Kosnett, Presidenti i Kosovës tha se takimet të tilla ndodhin shpesh dhe janë të rregullta, natyrisht gjithmonë në koordinim dhe në konsultim të ngushtë me SHBA-të:

“Kosova ka qenë, është dhe do të mbetet mik i përjetshëm i SHBA-ve dhe nuk ka individ apo agjendë ditore që do ta sfidojë këtë partneritet të shtetit të Kosovës, të vullnetit të qytetarëve as sot as në të ardhmen me SHBA-të”, tha Presidenti i Kosovës, Hashim Thaçi.

Por kërkesa e Shteteve të Bashkuara për pezullimin e taksës 100 për qind për mallrat nga Serbia, ka lëkundur koalicionin qeverisës. Kjo është parë edhe në deklaratat e krerëve të partive të koalicionit, ku nuk kanë munguar edhe deklarimet për zgjedhje të parakohshme. Edhe kryeministri Ramush Haradinaj nuk e ka përjashtuar mundësinë që të ketë prishje të koalicionit por ai ka thënë se është shumë me rëndësi që të miratohet buxheti të shtunën, në mënyrë që punëtorët të mos mbesin pa paga, e taksa gjithsesi do të mbetet.  .

“Dëshira ime është që e para këtë të shtunë të kryhen disa detyra që janë me interes për vendin, sikur që është buxheti, mos të mbesin arsimtarët e të tjerët pa paga, sepse e dimë çka do të thotë ajo. Nëse mospajtimet politike vazhdojnë, mund të rezultojnë edhe me të arritura të tjera, cilat do qofshin ato”, ka thënë Haradinaj.